Улсын Онцгой комиссоос сэрэмжлүүлэг мэдээлэл хүргэлээ.

Нийслэлд тогтоосон хатуу хөл хорионы дэглэмийг маргааш өглөөний 06:00 цагт бууруулна.

Хэдий бүх нийтийн бэлэн байдлыг сулруулж байгаа ч халдвар хамгааллын дэглэмийг баримтлахыг УОК-ын гишүүн Ц.Ганзориг анхаарууллаа.

Тэрээр "Сүүлийн хагас жилийн хугацаанд хүн амын дунд халдвар тарснаас хойш 44 мянган хүн халдварт өртөж, 164 хүн амь насаа алдсан эмгэнэлтэй үйл явдал болоод байна. Нөхцөл байдлын улмаас Дөрөвдүгээр сарын 10-наас Тавдугаар сарын 8-ны 06:00 цаг хүртэл 26 хоногийн хугацаанд гамшгийн "Улаан" түвшинд буюу хөл хорионы дэглэм тогтоосон. Ингэснээр мэргэжлийн байгууллагуудын тооцооллоор 15 мянга гаруй хүнийг халдварт өртөх эрсдэлээс сэргийлсэн байна. Гэсэн хэдий ч нөхцөл байдал хүнд байна. 

Улсын Онцгой комиссоос ард иргэд, төрийн болон төрийн бус байгууллага, улс төрийн нам эвслүүдэд хандан дараах сэрэмжлүүлгийг хүргэж байна.

• Цар тахлын аюул хэвээр байгаа тул иргэн та шаардлагагүй тохиолдолд гэрээсээ гарахгүй байх;

• Айлд зочлохгүй, хүн гэртээ урихгүй байх;

• Албан байгууллага, гудамж талбайд хүн олноор цуглуулахгүй байх;

• Олныг хамарсан уулзалт арга хэмжээ зохион байгуулахгүй байх;

• Иргэн бүр цар тахлаас эрүүл мэндээ хамгаалах дэглэмийг хатуу мөрдөж, вакциндаа хамрагдах;

• Вакцинд хамрагдсаны дараа ч тайвшрахгүйгээр халдвар хамгааллын дэглэмээ баримтлах;

• Гараа байнга ариутгах, амны хаалтаа зүүх;

• Аймаг, нийслэлийн Засаг дарга нар иргэдийг орон нутаг, хот хооронд зорчуулахгүй байх;

• Засаг захиргааны нэгждээ халдвар хамгааллын дэглэмээ сайтар сахиж, халдварыг хумих;

• Иргэд хүн хоорондын зайг ямагт баримталж, өөрийгөө болон гэр бүлээ халдвараас хамгаалахын төлөө дэглэмийг чанд сахихыг онцгойлон анхааруулж байна.

Халдварын нөхцөлийг ямар байгааг эрдэмтэн, судлаачид цаг алдалгүй судалж байгаа" гэлээ.