УОК-оос сэрэмжлүүлэг мэдээлэл хүргэлээ.

Манай улсад коронавирусийн мутацилагдсан генийн хэлбэр илэрч байгаа талаар ХӨСҮТ-ийн Ерөнхий захирал Л.Баттөр мэдээллээ.

Тэрээр "Бид Бүх нийтийн бэлэн байдал зарлаад 28 хоног боллоо. Гэхдээ бидний санасан, тоцоолсон үр дүнд хараахан хүрч чадсангүй. Гамшгийн зэрэглэл буурч бид журам гаргаж буй ч эрсдэл хэвээр байгааг та бүхэн мартаж болохгүй. Вакцинжуулалт тодорхой хэмжээнд сайн явж байна. Гэвч хүүхдүүд, жирэмсэн эх болон эрүүл мэндийн шалтгаануудын улмаас вакциндаа хамрагдаж чадаагүй иргэд бий. Эдгээр иргэний дунд цар тахлын аюул байсаар байгаа. Мөн вакцинаа хийлгэсэн ч халдвар авсан тохиолдол цөөнгүй гарсан. Эхний тунгаа хийлгэсэн иргэдийн нэг хүртэл хувь нь халдвар авсан байна. Түүнчлэн хоёр дахь тундаа хамрагдсан ч өвчилсөн тохиолдол  байгаа тул вакцинаа хийлгэсэн ч халдвар хамгааллын дэглэмээ барих, ард иргэдийг халдвараас хамгаалахын тулд үргэлжлүүлэн мөрдөх шаардлагатай байгаа. 

Монгол Улсад коронавирусийн мутацилагдсан хэлбэрүүд илэрч байгааг өмнө нь мэдээлсэн билээ. Манай эрдэмтэд Япон улсад судалгааны ажил хийхэд манай улсад тохиолдож буй өвөрмөц буюу мутацилагдсан генийн хэлбэр илэрч байгаа. Иймд сорьцын тоог нэмэгдүүлж, өвчлөлийн хоруу чанар, хүндрэл тархалт нөлөөлж буй эсэхийг нарийвчлан тодорхойлох шаардлага байгаа. 

Түүнчлэн зөөвөрлөгдсөн тохиолдлуудад мутацилагдсан хэлбэр орж ирсэн байхыг үгүйсгэхгүй. Зарим нэг гений дараалласан судалгаа хийгээгүй ч PCR шинжилгээний явцад ажиглагдаж байна.

Маргаашаас эхлэн бүх нийтийн бэлэн байдлын зэрэглэлийг бууруулж байгаа ч иргэд сэрэмжээ алдахгүй байж, хайртай үр хүүхдүүд, ойр дотны хүмүүсийнхээ эрүүл мэндийн төлөө халдвар хамгааллын дэглэмээ баримтлахыг хүсье" гэлээ.