Өчигдөр өргөн нэрвтрүүлгийн телевизийн найман сувгаар зэрэг цацагдсан "Мэдээлллийн урсгал" нэвтрүүлгийн үеэр УИХ-ын гишүүн асан, "Монполимет" компанийн захирал Ц.Гарамжав, Zarig.mn сайтын сэтгүүлч хоёрын дунд гал авалцсан хэрүүл болов. Хэрүүлийн суурийг тавьсан гол эзэд нь манай гааль татварын байгууллагууд, Монголбакныхан.
Монголбанк болон ГЕГ, ТЕГ-аас гаргаж өгсөн мэдээллээр "Монполимет" компанийг их хэмжээний татварын болон бусад өртэй гэж, тэрийг нь үндэслэж Ц.Гарамжав захирлыг буруутгасан сэтгүүлч "хүн гүтгэсэн" хэргээр Эрүүгийн шүүх хуралд дуудагдсан юм байна. Эх сурвалжуудаас нь мэдээлэх үүрэгтэй "Мэдээллийн урсгал" харамсалтай нь энэ дүрмээ барьсангүй. Мэдээллийн "хохирогчид" болсон хоёр талыг дуудаж авчираад "хонх цохичихоод" рингний голд шүүгч хийгээд суучихдаг байгаа. Сэтгүүлч нь гартаа оруулсан мэдээллээ хамгаалж, Ц.Гарамжав нь няцааж. Төрийн байгууллагын гаргасан тайлангаас болж хоёр иргэний хооронд үүссэн маргааныг нийтээрээ шүүцгээв. Эцэст нь сэтгүүлч буруутай болоод үлдэх бололтой.
Мөн үүнтэй адил зүйл өчигдөр СЕХ-н дээр боллоо. АН-аас Ерөнхийлөгчид нэр дэвшсэн С.Эрдэнэ, Н.Алтанхуяг нарын материалыг хүлээж авсан СЕХ-ны дарга хоёр хоногийн дараа "Хоорондоо ярьж тохироод нэгийгээ нэр дэвшүүлээд ир" гэснээс болж нэг намынх нь генсек, нөгөө намын нэр дэвшигч хоёр бие биенээ "алахаас наагуур" юм болов. Н.Алтанхуяг нь Ч.Өнөрбаярыг "Ард түмэн чамайг дүүжилнэ шүү" гэж хэлсэн нь соошлаар нэг юм болж байна. "Ерөөсөө энэ хүн Ерөнхийлөгч болох юм бол бүгдийг нь дүүжлэх юм байна"... энэ тэр. Хөөрхий тэр хүний "нэр дэвших боломжгүй боллоо" гэдэг айдас, бухимдлаасаа болоод хууль тогтоогч биш, хувь хүн Н.Алтанхуяг л болж хувирсан байдаг юм.
Уг нь бол Н.Алтанхуягийн өмнөөс бодоод үзвэл дүүжлүүлэх хэрэг хийсэн этгээд нь Ч.Өнөрбаяр биш, СЕХ буюу хорооны дарга. Хоёр талын материалыг хүлээж авсан бол гишүүдээ хуралдуулаад, хэнийх нь материал хуульд тавьсан шаардлага, шалгуурыг хангасан байна, тэрийг нь хүлээж аваад маргааныг дуусгаж болох байлаа. Гэтэл "Гадаа гараад өрчих, дийлсэн нь ороод ир" гэдэг нь угаасаа "баба" болчихоод байгаа намыг улам муухай харагдуулах гэсэн эрх баригч намын даалгавар байх л даа.
Тэгээд Н.Алтанхуяг нь УИХ дахь намын бүлгийн гишүүдээ аваад талбай дээр өлсгөлөнд суусан байдаг юм. Хуанлийн дагуу өчигдөр шөнө эхэлсэн өлсгөлөн өнөөдөр хоёр дахь өдөртэйгөө золгож байна. Харин СЕХ өлсгөлөн эхэлсний дараа гэнэт сэхээ орж, нийт гишүүдийн хурлаа яаралтай зарлаад нэр дэвшигч С.Эрдэнийн материалыг хүлээж авсан байна. Өлсгөлөн зарласан нөхөд өнөөдөр өлсгөлөнгөө буулгаад нэр дэвшигчийн материалаа СЕХ-нд шинээр хүргүүлэхгүй бол АН-аас С.Эрдэнэ нэр дэвшихээр болов.
Б.ЗАЯА
