Вакциндаа бүрэн хамрагдаад 14 хоносон буюу дархлаа тодорхой хэмжээнд тогтсон иргэд ирэх даваа гаригаас үйл ажиллагаа нь нээгдсэн үйлчилгээний байгууллагуудаар үйлчлүүлэх боломжтой боллоо. 

Нийслэлд тогтоосон Бүх нийтийн бэлэн байдлын “улаан” түвшинг энэ сарын 8-наас зэрэглэл бууруулж өндөржүүлсэн бэлэн байдлын "улбар шар" түвшинд шилжүүлж буй.

Энэ талаар Улсын Онцгой комиссын хэвлэлийн төлөөлөгч Ц.Ганзориг "Тавдугаар сарын 8-наас ААН-үүдийн 80 хувь нь ажиллаж эхэлнэ. Бизнес, нийгмийн чиглэлийн үйл ажиллагаа эрхэлдэг 89 төрлөөс 18 салбарынх хязгаарлагдаж байна.

Эрсдэл өндөрт тооцогдох үсчин, гоо сайхан давтан тунгаа хийлгэсэн хүмүүст үйлчилнэ.

Харин Тавдугаар сарын 15-наас буюу долоо хоногийн дараачаас дархлаа дэмжих төвүүд буюу бялдаржуулах төв, фитнесс, саун, бассейн зэрэг газрууд давтан тундаа хамрагдсан хүмүүст нээлттэй болно. 

Тиймээс иргэд e-Mongolia хуудаснаас давтан тундаа хамрагдсаныг гэрчлэх QR код бүхий сертификатыг авах юм. Уг кодыг уншуулдаг системийг Мэдээлэл, технологи, харилцаа холбооны газраас Даваа гаригт бэлэн болгоно" гэлээ.

Мөн тэрээр Тавдугаар сарын 22-ноос Улаанбаатар хот дахь вакцинд хамрагдах ёстой нэг сая хүн бүгд хамрагдсан байх тооцоололтой гэдгийг онцлов. 

Тавдугаар сарын 22-ноос том захуудын үйл ажиллагааг нээнэ. Мөн давтан тунгаа тариулаад 14 хоносон бол хөдөө орон нутагт ПСР шинжилгээ өгөх шаардлагагүй, хязгаарлалтгүй зорчиж болно.

Вакцинд хамрагдсан иргэдийг 50,000 төгрөгөөр урамшуулах болсон нь дэлхийд вакцинжуулалт амжилттай хэрэгжүүлж байгаа улс орнуудад мөн хэрэгжүүлж байгаа хөшүүргийн арга гэдгийг тэрээр тодотголоо.