Энэ оны Тавдугаар сарын 5-ны байдлаар дэлхийн 121 улс орон хилээ бүрэн болон хэсэгчилэн хаасан хэвээр байна. Улс орнууд хилээ хаахдаа ямар дүрэм журам горимыг хэрэгжүүлсэн гэхээр зөвхөн өөрийн улсын иргэнийг хилээрээ нэвтрүүлж, тухайн улсад байнга оршин суудаг гадаад улс орны иргэдийг хилээрээ зорчуулж байна. Бусад улсын иргэдийн тухайд богино хугацааны бүх төрлийн виз олгох үйл ажиллагаагаар дамжуулан хилээ бүрэн болон хэсэгчилэн хаах горимыг хэрэгжүүлж байна.

ГХЯ-ны Конуслын газрын захирал Л.Мөнхтүшиг "Манай улс гадаадын 7 улс орон руу шууд нислэг үйлдэж байна. Өнөөдрийн байдлаар манай улсаас шууд нислэгтэй БНХАУ, БНСУ, Япон болон Герман зэрэг Европын улс орнууд виз олголтыг түр зогсоогоод байгаа. Мөн байнга оршин суудаггүй гадаад улс орны иргэдийг хилээрээ нэвтрүүлэхгүй байх горимыг мөрдөн хэрэгжүүлж байна.

Монгол Улсын хувьд цар тахлын нөхцөл байдлын эхнээс хилээ шат дараатай хааж ирсэн. Энэ шийдвэртэй уялдуулаад гадаад улс орнуудад суугаа ЭСЯ болон консулын газрууд 2020 оны Нэгдүгээр сарын 27-ноос эхлэн богино хугацааны бүх төрлийн виз олгохыг зогсоосон юм. Манай улсын хилээр өнгөрсөн хугацаанд нэвтрэх боломжтой иргэдийн тухайд Монгол Улсын иргэн Үндсэн хуулийн хүрээнд олгсон эрхийнхээ хүрээнд эх орондоо ирж байгаа.

Мөн гадаад улс орнуудын жишгийн дагуу Монгол Улсад байнга оршин сууж ажил, амьдрал нь манай улсад байдаг гадаадын иргэдийг оршин суух үнэмлэхийг үндэслэн хилээр нэвтрүүлж ирсэн. Мөн төрийн болон хувийн хэвшлийн шугамаар богино хугацаагаар зайлшгүй ирэх шаардлагатай гадаад орнуудын мэргэжилтнүүдийг зөвхөн явах, ирэх тийзийг нь үндэслээд Монгол Улсад ирэхэд тусгаарлах нөхцөлийг хангасны үндсэн дээр цөөн тооны гадаадын иргэд хөрөнгө оруулагч болон ибзнес эрхлэгчийн өнөөдрийн байдлаар улсын хилээр нэвтрүүлж байна" гэлээ.

Монгол Улсын хилээр өнөөдрийн байдлаар нэвтэрч буй гадаадын иргэдэд манай улсаас дараах шаардлагыг тавьж байна.

Үүнд:

• Вакцинжуулалтаа бүрэн хийж, 14 хоног болж буй иргэдийг тусгаарлахгүйгээр нэвтрэх боломжоор хангаж байна.

• Вакцинжуулалтад хамрагдаагүй иргэдийг 7 хоног тусгаарлаж байна.

• Вакцины 2 дахь тунгаа хийлгэсэн ч 14 хоног өнгөрөөгүй байгаа иргэдийн хувьд тусгаарлаж байна.

Монгол Улсад зорчин ирж буй бүх иргэнд сүүлийн 72 цагийн дотор коронавирусийн эсрэг PCR-ийн шинжилгээнд хамрагдсан, шинжилгээний хариу сөрөг гарсан байх зайлшгүй шаардлагыг тавьж ажиллаж байна.

ГХЯ-ны Конуслын газрын захирал Л.Мөнхтүшиг "Одоогоор манай улсад болон олон улсад нийтээр зөвшөөрсөн тийм гэрчилгээ, паспорт байхгүй, гараагүй байгаа. Зөвхөн ийм хэрэглээ шаардлага байгааг хэлэлцэн нийтээр хүлээн зөвшөөрч хэрэглэхийг уриалж байгаа. Улс орнуудын зарим нь зөвхөн дотооддоо ийм гэрчилгээг хэрэглэж буй бөгөөд үүнийг олон улсад нэвтрүүлэх талаар хоорондоо хэлэлцэж байж шийднэ” гэлээ.

Тэрээр мөн ингэж байж тухайн улсын гэрчилгээ бусад улсад харилцан хүлээн зөвшөөрөгдөж мэдээлэл солилцсоноор хүчин төгөлдөр болно гэдгийг онцлов.

Манай улс цахим бүртгэлийн E-Mongolia талбарт суурилан энэ ажлыг хийхээр зохион байгуулж байгаа. Тодруулбал, вакцины бүрэн тунгаа хийлгэсэн иргэд энэ талын мэдээллээ дээрх цахим системээс авах боломжтой. Цаашлаад гадаадад зорчиход энэ мэдээллийг гадаад паспортын хамт тавьж, монгол, англи хэлээр, улмаар НҮБ-ын албан ёсны 6 улсын хэлээр хүргэж байхаар хөгжүүлэлтийг хийж техникийн шийдэл бэлэн болжээ.

Тодруулбал, Монгол Улсын иргэний вакцин хийлгэснийг гэрчлэх албан ёсны вакцины паспорт гэрчилгээ бэлэн болсон. Үүнд тухайн иргэний гадаад паспортын дугаар, вакцинд болон PCR-ийн шинжилгээнд хамрагдсан байдал он сар, өдөр зэрэг бүхий л мэдээллийг багтааж байгаа аж.