Засгийн газрын өнөөдрийн хуралдаанаар вакцинжуулалтыг идэвхжүүлэх зорилгоор хоёр төрлийн арга хэмжээг хэрэгжүүлхээр болжээ. 

Тодруулбал, вакцин хийлгээгүй иргэдэд албадлагын арга хэмжээг авах бол вакцинаа бүрэн хийлгэсэн иргэдэд 50,000 төгрөгийн урамшуулал олгохоор болжээ. 

Энэ талаар Сангийн сайд Б.Жавхлан "Вакцинд хамрагдаагүй хүмүүсийн өмнөөс нийгэм даяараа эрсдэлд орж болохгүй. Вакцинаа хийлгээгүй иргэдэд албадлагын арга хэмжээг авна.

Улаанбаатарт хүнсний талон авдаг 47 мянган иргэн байгаагаас 29 мянга нь вакцины эхний тунгаа ч хийлгээгүй байна. Мөн төрөл бүрийн халамж авдаг 211 мянган иргэн байгаагаас 80 гаруй мянга нь вакциндаа хамрагдаагүй байна. Иймээс өнөөдрөөс эхлэн дараагийн саруудад олгогдох хүнсний талон, халамжийг олгохдоо вакцинд хамрагдсан эсэхийг нь харгалзан үзнэ" гэсэн юм.

Мөн өнөөдрийн Засгийн газрын хуралдаанаар Эрүүл мэндийн яам, Сангийн яам хамтран баталсан Эрүүл мэндийн даатгалын сангаас коронавирусийн эсрэг эрүүл мэндийн цогц үйлчилгээний журмыг баталжээ.

Энэ талаар Эрүүл мэндийн сайд С.Энхболд "Журамд коронавирусийн сорьц авах, дархлаажуулалтын ажилтан, хөнгөн хэлбэрээр өвчилж тусламж үйлчилгээ авч байгаа иргэдэд өрхийн эрүүл мэндийн эмчийн хяналтаар санхүүжүүлэхээр болсон. Эмнэлэгт хэвтэн эмчлүүлж байгаа нэг иргэний эмчилгээний зардал 650 мянгаас 4,3 сая төгрөг байхаар шинэчлэн тогтоолоо. Энэхүү санхүүжилтийг үйлчилгээ үзүүлсэн иргэдээр тооцож, эрүүл мэндийн байгууллагуудад олгоно" гэлээ.