“Тавантолгой түлш” ХХК нийслэлийн гэр хорооллын айл өрхүүдийг угаарын хийнээс урьдчилан сэргийлэх, болзошгүй эрсдэлээс хамгаалах зорилгоор “Аюулгүй байдал-Нэгдсэн хяналт” сэдэвт аяныг өнөөдрөөс эхлүүллээ.

"Тавантолгой Түлш" компанийн Хэрэглэгчдэд үйлчлэх албаны дарга Ч.Буянжаргал:

“Цаг агаар дулаарах тусам гадаад, дотоод орчны агаарын температурын зөрүү багасч, зуух пийшингийн яндангийн таталт муудан угаартах эрсдэл нэмэгддэг. Иймд  4-6 дугаар сард угаарын хийн хордлогоос урьдчилан сэргийлэх, эрсдэлээс хамгаалах зорилгоор айл өрх бүр өвлийн бэлтгэл ажлыг хангах ажлын хүрээнд зуухны бүрэн бүтэн байдлыг хангах, яндангаа хөөлөх, зөв галлагаа хийх, агааржуулалтын системийг сайжруулах, угаарын хийн мэдрэгчийнхээ тэжээлийн зайг шалгах, зөв байршуулах зайлшгүй шаардлагатай" гэв.

Тиймээс сайжруулсан шахмал түлш хэрэглэж байгаа айл өрхүүдэд энэ заавар зөвлөмжийг хүргэж ажиллана. Мөн айл өрх бүр хөл хорионы үед аюулгүй байдлаа хангаж, зуух пийшингийнхээ битүүмжлэлийг шалгаж, яндангаа хөөлөхийг уриаллаа.

Судалгаанаас үзэхэд угаартсан айл өрхүүдийн 60-70 хувь нь зуух, ханан пийшингийн битүүмжлэл алдагдсан, яндангаа хөөлөөгүйгээс үүдэлтэй байдаг. Өнгөрсөн оны аравдугаар сард БОАЖЯ-тай хамтран “Яндангаа хөөлөе” аяныг хэрэгжүүлж, аяны хүрээнд 20 гаруй мянган айлын янданг хөөлж, зуух пийшинг засварласан байна. Үүний үр дүнд 2019 оны намар, 2020 оны хавар бүртгэгдсэн угаарын хийн хордлогод өртсөн хүний тоо  2020 оны намар, 2021 оны хавар бүртгэгдсэн угаарын хийн хордлогын дуудлага мэдээлэлтэй харьцуулахад 70 гаруй хувиар буурсан үзүүлэлт гарсан байна.

Угаарын хийн хордлого, түүнтэй холбоотой дуудлага мэдээллийг бууруулахад Тавантолгой түлш ХХК-ийн Хэрэглэгчдэд үйлчлэх албаны Хяналтын ажилтнуудын үүрэг оролцоо их байдаг. Хяналтын ажилтнууд тус бүр 200-250 айл өрхийг хариуцан ажиллаж, айл өрхүүдэд угаарын хийнээс урьдчилан сэргийлэх заавар зөвлөмжийг өгч ажиллаж байна.

Тухайлбал, өнгөрөгч аравдугаар сард Баянзүрх дүүргийн 21 дүгээр хорооны дугаар тоотод амьдрах 49 настай эмэгтэй, нэг сартай нярай хүүхдийн хамт угаартах эрсдэлд орсон байсныг Хяналтын ажилтан эмэгтэй дөрвөн гудамжны цаанаас угаарын хийн мэдрэгчийн дуут дохиог сонсож амь насыг нь аварсан байна.

“Аюулгүй байдал-Нэгдсэн хяналт” аяны хүрээнд айл өрхүүдээс зуух пийшин хөөлүүлэх дуудлага мэдээллийг Хэрэглэгчдэд үйлчлэх албаны 7011-9400 дугаарын утсаар авах бөгөөд дуудлагын дагуу мэргэжлийн яндан хөөлөгчид газар дээр нь очиж заавар зөвлөгөө өгч, шаардлагатай тохиолдолд янданг нь хөөлж өгөх юм. Ингэхдээ дуудлага өгсөн айл бүрт хүрч үйлчлэх хомс учир заавар зөвлөгөө түлхүү өгөх юм. Харин хөгжлийн бэрхшээлтэй, өндөр настнуудыг яндан, зууханд засвар үйлчилгээг хийж өгөх ажээ.