Олимпийн аварга, Монгол Улсын хөдөлмөрийн баатар, МҮОХ-ны Ерөнхийлөгч Н.Түвшинбаяр Улсын начин Э.Энхбатыг зодож, биед нь хүнд гэмтэл учруулсан хэргээр шалгагдаж, цагдан хоригдсоны дараа буюу энэ сарын 15-нд анх хорих ангид хоригдол болон хоригдогч нар коронавирусаар өвчилсөн тухай анхны мэдээлэл цацагдсан билээ. Тухайн үед халдвар авсан нийт хүмүүсийн /хоригдол болон хоригдогч/ тоо 35 хүрсэн тухай мэдээлэгдэж байсан бол өнөөдөр энэ тоо 400-гаас хол даваад байна.
Өнгөрөгч баасан гаригийн байдлаар ШШГ байгууллагын 81 албан хаагч, 300 гаруй хоригдол болон хоригдогч /урьдчилсан хорих байранд саатуулагдаж байгаа гэмт хэрэг үйлдсэн нь шүүхээр тогтоогоогүй хүмүүс/ коронавирусын халдвар авч өвчилжээ. Өнөөдөр энэ тоо өссөн байх магадлалтай.
Одоогийн байдлаар Амгалангийн Хорих 409-р анги, Дарханы замд байрлах Хорих 407-р анги, Урьчилсан хорих байр буюу 461-р ангид халдвар тархаж, халдвар авсан хүмүүсийг Зайсан дахь Хорих 401-р анги буюу хорих эмнэлэг, Урьдчилан хорих 461-р ангийн эмнэлэгт эмчилж байгаа юм байна. Хамгийн хүнд нөхцөлтэй байгаа нь 409, 461-р хорих анги аж. Хорих 409-р ангийн харуулын ахлагчаас аваад хорихын дарга нь хүртлээ бүгд халдвар авч, хорихын дарга нарыг Улсын 2-р төв эмнэлэг рүү шилжүүлсэн тухай эх сурвалж мэдээллээ. Хорих 461-р ангийн хувьд коронавирусын халдвартай хүмүүсээс бусдыг хэвтүүлж эмчлэх боломжгүй болтлоо эмнэлгийн ачаалал нэмэгдсэн байна.
ХЭҮК-оос "Төрийн хамгаалалттай байранд эрүүл орж ирсэн хүн хорих ангиас халдвар авч байна" гэсэн иргэдийн гомдлын дагуу хорих ангиудад яаралтай шалгалт хийж эхэлжээ. Халдвар тархаж байгаа гол үндсэн шалтгаан нь хорих байрны агааржуулалт муу, нэг өрөөнд олноор хорьдогтой холбоотой.
Ийм нөхцөл байдал үүсэх эрсдэлтэй гэж үзсэний үндсэн дээр өнгөрсөн онд буюу Монгол Улс коронавирусын халдварыг дотооддоо алдсаны дараа НҮБ-аас зөвлөж гаргаж, гэм бурууг нь шүүхээр тогтоогдоогүй буюу урьдчилсан хорих байранд саатуулагдаад байгаа хүмүүс, мөн хөнгөн ялтай хэрэгтнүүдээ суллаж, хорих ялыг өөрчлөх болон хэргийг нь гадуур шалгах шаардлагатай тухай анхааруулга, санамж өгч байсан боловч Засгийн газар "Хууль баталж байж суллана" гэсээр жил тойржээ.
Халдварын тархалтыг хязгаарлаж чадахаа болж, хавтгайруулан алдсаны дараа буюу өнгөрөгч сард УИХ-ын гишүүн, Хүний эрхийн дэд хорооны дарга С.Одонтуяа хууль санаачлан УИХ-д өргөн барьсан авч "Өршөөлийн хууль гаргах гэж байгаа учраас давхардуулж хэлэлцэхгүй" хэмээн буцаасан байдаг. Энэ онд 100 жилийн ойгоо тэмдэглэж байгаа эрх баригч МАН ирэх долдугаар сард болох улсын баяр наадмаар Өршөөлийн хууль батлан гаргахаар төлөвлөсөн бөгөөд энэ шалтгаанаар Засгийн газар НҮБ-ын зөвлөмжийг хэрэгжүүлэхээс татгалзжээ.
Сарын дотор 400 давчихаад байгаа халдварын тоо дахиад гурван сар өнгөрөхөд хэд болж өсөх, хэд нь амиа алдахыг хүлээхэд бэрхтэй болоод байна.
Б.ЗАЯА
Сэтгэгдэл (1)