Олимпийн аварга Н.Түвшинбаяр улсын начин Э.Энхбатыг зодож, биед нь хүнд гэмтэл учруулсан хэргээр хорих 461-р ангид цагдан хоригдсоны дараа “Н.Түвшинбаяр аварга коронавирусын халдвар авчээ” гэдэг мэдээлэл хэвлэл мэдээллийн хэрэгслүүдээр цацагдсан. Тухайн үед (2021.04.15) тус хорих ангид халдвар авсан хоригдлуудын тоо 35 болсон байсан ч Н.Түвшинбаярыг халдвар авахаас өмнө энэ талаар огт мэдээлэгдээгүй.

Үүнээс найм хоногийн өмнө буюу энэ сарын 6-нд Шүүхийн шийдвэр гүйцэтгэх газрын харьяа хорих ангиудад ял эдэлж, албадан саатуулагдаад байгаа хоригдол, сэжигтнүүд, хорихын ажилтнуудад коронавирусын эсрэг вакцинжуулалт хийж эхэлсэн тухай мэдээлсэн. ШШГЕГ-ын дарга, хурандаа Д.Загджав хорих 409-р хорих ангид очиж, хоригдол ажилтнуудад коронавирусын халдвараас сэргийлэх вакцин хийж байгаатай танилцсан байдаг юм.

Гэсэн хэдий ч хорих ангиудад коронавирусын халдварын тархалт нэмэгдэж, хоригдол, ажилтнууд өвчилсөөр байгаа аж. Хамгийн түрүүнд вакцинжуулалтад хамрагдсан 409-р нээлттэй хорих ангийн дарга, ажилтнууд халдвар авч халдвар авч, 22 хоригдол коронавирусаар өвчилсөн тухай эх сурвалж хэлэв. Хорих 461-р анги буюу Урдьчилсан хорих төвд өчигдрийн байдлаар 96 хүн коронавирусаар өвчилсөн. Хорих ангийн дарга нь өмгөөлөгчид рүү нь утасдаад "Хүнээ авахгүй бол манайх дийлэхээ болилоо" гэж байна. Гэтэл Хууль зүй, дотоод хэргийн сайд нь таг чиг...

Хорих ангид халдвар хурдацтай тархаж байгаа нэг шалтгаан нь тэнд агааржуулалт муу, хоригдлууд нэг өрөөнд олноор хоригддог, нийтээрээ нэг дор хооллодогтой холбоотой. Тиймээс өнгөрсөн онд дотоодын халдвар тарсны дараа НҮБ-аас манайд зөвлөмж өгч, түр саатуулах байрны буюу гэмт хэрэг үйлдсэн нь нотлогдоогүй байгаа хүмүүсийг, мөн хөнгөн ялтай хэрэгтнүүдийг суллахыг сануулсан байдаг. Гэвч Засгийн газар "хууль баталж байж зөвлөмжийг хэрэгжүүлнэ" гэсээр жил тойрчихов. Хууль өргөн бариагүй, эсвэл өргөн барьсан хуулийг нь УИХ хэлэлцээгүй.

Халдварын тархалт хяналтаас гарсны дараа буюу өнгөрсөн гуравдугаар сард УИХ-ын гишүүн С.Одонтуяа хууль өргөн барьсан боловч "Өршөөлийн хууль гарах гэж байхад давхардуулж хэлэлцэхгүй" гээд буцаасан байдаг. УИХ өнөөдөр энэ хуулийг хэлэлцэхгүй юм бол өөр ямар хууль хэлэлцэх ёстой байсан вэ? Хуул зүй, дотоод хэргийн сайд нь яагаад асуудлаа тавьдаггүй юм бэ?

Дээр нь сүүлд тавигдсан хөл хорионы дараа УОК-ийн шийдвэрээр шүүхүүдийн үйл ажиллагааг зогсоочихсон. Үүнээс болж урьдчилан хорих төвд саатуулагдаад байсан, шүүхээс хэргийг нь хэрэгсэхгүй болгосон хүмүүсийн цагдан хориог цуцлах шүүх хурлууд хойшилж, үүнээс болоод гэм зэмгүй хүмүүс хууль бусаар цагдан хоригдож, коронавирусаар өвчилсөн тохиолдлууд ч гарсан байна. Ингэхэд Хуул зүйн сайд Х.Нямбаатар хэдэн хоригдлын аминд хүрч байж ам нээх вэ?

Б.ЗАЯА