Өнөөдрөөс эхлэн 49 мянгаас дээш тооны хүнд хоёр дахь тунд хамруулахын зэрэгцээ эрсдэлт бүлгийнхнийг вакцинд хамруулж эхлээд байна. Өдөртөө 60,000 орчим хүнийг вакцинд хамруулах төлөвлөгөөтэй ажиллах аж.
Өчигдөр Хятадын Синофарм үйлдвэрийн 300,000 тун Vero Cell вакциныг хүлээж авсан бол өнөөдөр мөн 300,000 тун вакциныг татан авна юм.
Мөн вакцины хоёр тунд хамрагдсан иргэд ажил, амьдралын хэвийн горимд орох асуудлыг УОК ярилцаж байгаа бөгөөд өнөөдрийн байдлаар улсын хэмжээнд 75 мянган хүн хоёр тунд хамрагдсан ч вакцинаас хойших 14 хоног өнгөрөөгүй хүмүүс байгаа юм. Ямартай ч дархлаажуулалтад бүрэн хамрагдсан иргэдээс PCR шинжилгээ шаардахгүй байх болон бусад нарийн зохицуулалтуудыг хийх журам боловсруулагдаж байгаа аж.
Иргэд коронавирусийн эсрэг вакцин хийлгэсэн ч халдвар хамгааллын дэглэмээ сулруулж болохгүйг санууллаа.
Өнөөдрийн байдлаар вакцины нэгдүгээр тунг хийлгэснийхээ дараа халдвар авсан иргэдийн тоо 2,304 болжээ.
Хоёр тунт вакцины бүрэн тунг хийлгэснээс тодорхой хугацааны дараа дархлаа үүснэ. Иймд иргэд вакцин хийлгэсэн гээд хяналтаа сулруулж болохгүй юм.
Мөн коронавирусийн халдвар аваад нас барсан иргэдийн дунд давтан тунгаа тариулсан иргэн байхгүй. Хоёр дахь тунг хийлгээд 14 хоног болоод дархлаа тогтсон ч амны хаалтаа тогтомол зүүж байхыг анхааруулав.
