Өнгөрсөн баасан гаригт Хууль зүйн сайд асан, ЗГХЭГ-ын дарга Ц.Нямдоржийн унаж явсан автомашиндаа хуурамч дугаар ашигласан тухай мэдээлэл олон нийтэд сүлжээнд тавигдаж, багагүй шуугиан тавьсан билээ. Түүний унаж явсан Lexus 570 машинд зүүсэн 0052 УБҮ улсын дугаар нь Toyota Land Cruiser 200 авто машиных болохыг "Тээврийн хэрэгслийн нэгдсэн цахим үйлчилгээ" буюу smart.mn сайтаас эх сурвалж болгон мэдээлсэн билээ.

Уг мэдээлэл цацагдсанаас хойш гурав хоногийн дараа буюу өнөөдрийн байдлаар Ц.Нямдорж сайдын унаж авсан машины улсын дугаарын мэдээлэл smartcar.mn дээр өөрчлөгджээ. 

Тодруулбал, smartcar.mn сайтад "0052УБҮ" улсын дугаарыг оруулахад 2018 оны Toyota Land Cruisser 200 маркийн машины мэдээлэл гарч ирж байсан бол өнөөдөр 2016 оны Lexus 570 гэсэн мэдээллээр солигдсон байна. 

Энэ мэт улс төрд нөлөө бүхий хүмүүстэй холбоотой мэдээлэл олон нийтэд цацагдсаны дараа иргэдэд "нээлттэй" мэдээллийг засварласан тохиолдол анхных биш юм. 

Тухайлбал, өмнө Шадар сайд С.Амарсайханы эхнэр Ч.Ичинхорлоо Улаан бүсэд нэвтэрсний дараа түүний хийлгэсэн вакцины талаарх мэдээлэл олон нийтийн сүлжээгээр цацагдсан. Гэвч шуугиант мэдээ цацагдсаны дараа eMongolia цахим сайт вакцины талаарх олон нийтэд "нээлттэй" байсан мэдээллийг "хаалттай" болгон өөрчилсөн байдаг.