Нийслэлд 14 хоногийн хатуу хөл хорио тогтоох Онцгой комиссийн шийдвэртэй зэрэгцүүлэн Ерөнхий сайд Л.Оюун-Эрдэнэ иргэн бүрт 300 мянган төгрөгийн нөхөн олговор зарлалаа. Сангийн сайдын “7 хоногт багтаана” гэж амласан нөхөн олговрын мөнгө өчигдрөөс иргэдийн данс руу орж эхэлсэн. Ядаж л мөнгөтэй хоригдохоор болов, соошлаар нэг магтуу. Хүнийг бүр нэг адгийг нь үзэж, ягт нь тулгаж байгаад аяганд нь үмх хоол шидэж өгөхөөр л ингэж баярладаг байх. Сонгууль ч дөхөж байна.

Шинэ оны шампансктай хамт Ерөнхийлөгчийн буудуулсан өрх бүрийн сая төгрөг ингэж хэд нугараад иргэдийн гар дээр ирсэн байдаг юм. Өрх бүрийн сая төгрөгт 400 тэрбум төгрөг шаардлагатай байсан бол иргэн бүрт 300 мянгыг өгөхөд  нэг их наяд  хэрэгтэй. Гаргая гэсэн үедээ гаргадаг л мөнгө юм байна. Зөрүүлээд нөгөөх нь “сар бүрийн сая төгрөг” ярьж эхэлсэн гэнэ.

Хэдхэн хоногийн өмнө Ерөнхий сайдын зөвлөх Н.Түвшинбаяр багын найзаа зодож үхлийн ирмэгт аваачсанаас хойш Л.Оюун-Эрдэнэ тэр хүнийг танихаа больсон байдаг юм. Н.Түвшинбаяр нь уучлал гуйх ухамсар дутуу юм бол ядаж Л.Оюун-Эрдэнэ нь уучлал гуйчихаач гэсэн чинь хэвлэлийн төлөөлөгч нь гарч ирээд “Тэгж яривал Н.Түвшинбаярыг томилоо ч үгүй байсан. Бичиг цаасныхаа шатанд л явсан” гээд бултсан. Асуудал гарах болгонд заавал нэг шалтаг олно, зөрж ярина.

Өнгөрсөн онд Засгийн газар төсвөөс гадуур зарцуулсан Ковидын эсрэг таван их наяд төгрөгийнхөө тайланг танилцуулаач ээ гэж парламентын сөрөг хүчин нь лав гурван сар нэхэж, шаардаж байна. Тэгсэн мань эр зөрүүлээд “тэгвэл энэ онд 10 их наяд болгочихьё” гээд даваад явсан. "У.Хүрэлсүх л зарцуулсан шт, маньд ямар хамаатай" л гэж адарч байгаа бололтой. Ерөнхийлөгч нь 400 тэрбумын төсөв гуйсан чинь “400 байхгүй ээ, нэг их наяд байвал ямар вэ?” Оньсого таалгаад байгаа юм уу, хаашаа.

Эндээс ямар нэг учир шалтгааны хэлхээ холбоо харагдаж байна уу? Хэрэв тийм зүйл байгаа бол тэр нь “Намайг хэн хэлж нохойг хэн саах юм” гэсэн хүч түрсэн бардамнал л харагдаж байна.   

Үнэндээ бол Н.Түвшинбаярыг Ерөнхий сайдын зөвлөхөөр зарласан нь өнгөрсөн хоёрдугаар сар. Түүнээс хойш хоёр сар шахуу хугацаа өнгөрөөд явж байхад Ерөнхий сайд маань Н.Түвшинбаярыг судалж дуусаагүй л байсан гэнэ. Төрийн, улс төрийн албанд томилж байгаа хүн бүрийг ингэж “нягт нямбай” судалдаг бол манай төр мандан бадарлаа, бадарлаа.

Үгүй тэгээд уучлал гуйхдаа хүрвэл юухан хээхэн ч багадахгүй л дээ. Хүний хөл дээр гишгэчихээд уучлал гуйдаг л биз дээ.   

Б.ЗАЯА