УИХ-ын гишүүн Б.Пүрэвдорж парламентын олонхитой үгээ ололцох гэж үнэхээр нэг аргаа барж байгаа бололтой. Өнөөдрийн нэгдсэн чуулганд тэр халбага ханцуйлж ирсэн байв. Бүр хоёрын зэргийг. 

Учир нь өнөөдөр чуулганы нэгдсэн "Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төсөл" болон хамт өргөн мэдүүлсэн хуулийн төслүүдийг хэлэлцсэн юм. 

Хэлэлцүүлгийн үеэр Хууль зүй дотоод хэргийн сайд Х.Нямбаатар "Баар, ресторан, лоунж зэрэгт архийг шилээр нь зарахыг хориглосон заалтыг хуулийн төсөлд тусгасан. Зөвхөн граммаар зарна. Соёлтой хэрэглээгээр дамжуулж, архидалтыг багасгах зорилготой" гэсэн билээ. 

Харин УИХ-ын гишүүн Б.Пүрэвдорж энэ талаар "Хуулийн төсөлд байгаа зарим заалттай санал нийлж байна. Архидан согтуурах явдал нийгэмд гай гамшиг авчирч байгаа нь үнэн. Гэхдээ төслийн хэд хэдэн зүйлтэй санал нийлэхгүй байна. Архийг шилээр нь биш, "шот"-оор нь зарна гэж байна. Тэр нь 30 грамм буюу амны халбага архи гэсэн үг. Монгол улсын хүн ам цөөн, ажиллах хүчин бага. Ийм хууль баталбал баар, ресторанд ажиллах залуусын тоо л нэмэгдэнэ. Баялаг бүтээдэггүй үйлчилгээний салбарт ажиллах хүчний эрэлт нэмэгдэнэ. Дараа нь пивоо ч уу гэх юм байна л даа" хэмээн уртаа иштэй шөлний халбага үзүүлэв.

Эцэст нь тэр "Хууль боловсруулахдаа амьдралд нийцтэй байдлыг нь бодолцох хэрэгтэй. Гэр хороололд архи хамгийн хямдхан байгаа. Архийг бага хэмжээгээр зарвал хүүхдүүд хамгийн түрүүнд өртөнө" гэсэн юм.

Мөн хэлэлцүүлгийн үеэр УИХ-ын гишүүдийн зүгээс дээрх хуулийн төсөлд тусгуулахаар,

-Амралтын өдрүүдэд архи, согтууруулах ундаа худалдахыг хориглох

-Цэгийн тоо буюу байршлыг цөөрүүлэх

-Цагийн хязгаарлалт тогтоох

-Үйлдвэрлэлд хяналт тавихаас гадна албадан эмчилгээтэй холбоотой заалтуудыг түлхүү оруулж өгөх

-Ажлын цагаар ажлын байранд архидан согтуурах явдлыг хатуу хориглох

-Чингис хаан, төрийн соёмбо, төрийн бэлгэ тэмдэгтэй архины үйлдвэрлэлийг хориглох

-Иргэдийн дунд соён гэгээрүүлэх ажлыг түлхүү зохион байгуулах зэрэг саналуудыг хэллээ.