Зэвсэгт хүчний 326 дугаар ангийн хугацаат цэргийн алба хаагч салаан даргадаа зодуулж, хүнд гэмтэж эмнэлэгт хүргэгдсэн харамсалтай хэрэг энэ сарын 29-ний өдөр гарсан.
Түүнийг ТТАХНЭ-т эмчлүүлж байсан бөгөөд цэргийн алба хаагч өчигдөр орой нас баржээ.
Төрийн тусгай алба хаагчдын нэгдсэн эмнэлгийн эх сурвалжын мэдээллээр "Талийгаач Гуравдугаар сарын 29-ний 01:39 цагт ухаангүй, биеийн байдал хүнд, комын байдалтай эмнэлэгт хүргэгдэн ирж, эрчимт эмчилгээний тасагт авсан. Ингээд тархины хатуу хальсан доорх цус харвалт, амьсгал зүрх судасны дутагдал, уушгины хатгалгаа оноштойгоор эмчилгээ хийж байсан бөгөөд 30-ны өдрийн 23:15 цагт нас барсан" гэлээ.
Хэргийг эргэн сануулбал, Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр "Зэвсэгт хүчний 326 дугаар ангийн салааны захирагч, дэслэгч Г нь гуравдугаар сарын 28-ны өдөр харуулын даргын үүрэг гүйцэтгэж байх үедээ харуулд гарч байсан байлдагч Б-ын биед халдан хүнд гэмтэл учруулсан. Гэмтэл авсан хугацаат цэргийн алба хаагчийг Төрийн тусгай албан хаагчдын нэгдсэн эмнэлэгт цаг алдалгүй хүргэж, эмнэлгийн яаралтай тусламж үзүүлж байгаа" гэж мэдээлсэн.
Мөн "Дэслэгч Г-тэй холбогдох хэргийг цагдаагийн байгууллагад шилжүүлсэн бөгөөд тухайн анги байгууллагын удирдлага, шат дараалсан албан тушаалтнуудад хатуу хариуцлага тооцохоор шийдвэрлэсэн. Түүнчлэн Хуурай замын цэргийн командлалын удирдлага, ЗХЖШ-аас ч хариуцлага хүлээхэд бэлэн байна" гэдгээ илэрхийлсэн гэсэн юм.
Талийгаасийн ар гэрийнхэн болон найз нөхдөд гүн эмгэнэл илэрхийлье.
