Коронавируст халдварыг илрүүлэхээр сүүлийн хоногт улсын хэмжээнд хийсэн шинжилгээний хариуг ХӨСҮТ-өөс танилцууллаа.

ХӨСҮТ-ийн дэд захирал Э.Тэмүүлэн:

-Сүүлийн хоногт 15 лабораторид 13,210 хүнд хийсэн коронавирусийн халдвар илрүүлэх шинжилгээний явцад 575 хүнээс халдвар илэрсэн. Ингэснээр нийт халдварын тоо 7,589 болж байна. Гадаадаас зөөвөрлөгдсөн нэг тохиодол бүртгэгдлээ. Франкфуртын онгоцоор ирсэн нэг иргэний давтан шинжилгээгээр халдвар илэрсэн.

Дотоодод халдвар авсан 574 тохиолдлын 400 нь Улаанбаатарт бүртгэгдсэн бол орон нутагт нийт 174 тохиолдол батлагдлаа. 

Сүүлийн хоногт 185 хүн эмчлэгдэн эмнэлгээс гарснаар нийт эдгэрсэн хүний тоо 4,711 боллоо. Өнөөдрийн байдлаар нийт 1,693 хүн эмчлүүлж байгаагаас биеийн байдал нь хөнгөн 1,416, хүндэвтэр 219, хүнд 29 нэн хүнд 9 хүн байна.

Нийслэл хотоос гадна Төв аймагт халдварын нөхцөл байдал хүнд байна. Сүүлийн хоногт гэхэд 86 тохиолдол бүртгэгдсэн. Та бүхэн нийгмийн харилцаагаа багасгаж, халдвар хамгааллын дэглэмээ чанд сахиарай" гэв.

"Ногоон бүс" байсан Сэлэнгэ аймагт халдвар батлагдаж, нийт 14 аймагт COVID-19 тархлаа

Энэ сарын 1-нээс нийслэлээс гарах хөдөлгөөнийг нээснээс хойш 28 хоногт нийт 14 аймагт коронавирусийн халдвар тархаж, сүүлийн 24 цагт орон нутагт 174 хүн өвчлөөд байна. 

Сэлэнгэ аймагт анх төмөр замаар дамжсан халдвар гарч, нийт 219 тохиолдол батлагдсан ч өнгөрсөн оны арванхоёрдугаар сарын 23-наас хойш дахин COVID-19 бүртгэгдэлгүй гөрван сар гаруй хугацаа өнгөрч, тус аймгийг "Ногоон бүс"-ээр зарлаад байсан билээ. Гэвч өнгөрсөн нэг хоногт тус аймагт халдварын хоёр тохиолдол шинээр бүртгэгджээ.

Мөн Өвөрхангай аймгийн "Сэмжид Хужирт" сувиллын газарт шинэ голомт дэгдэж, тус сувилалд амарсан 13 аймгийн 174 хүний 62-оос нь халдвар илрээд байгааг өчигдөр ЭМЯ мэдээлсэн билээ.