Улсын Онцгой комисс хуралдаж, ААН-үүд үйл ажиллагааг хязгаарлахгүй, хатуу хөл хорио тогтоохгүй гэсэн шийдвэр гаргажээ.

Өнөөдрийн хурлаар халдвар авсан иргэдийг гэрээр эмчилж, хяналтанд байлгах санал гаргаж маргаашийн Засгийн газрын хуралдаанд танилцуулахаар болжээ. 

Мэдээллийн зөрүүтэй байдал үүсгэхгүйн тулд Шадар сайд С.Амарсайхан, Эрүүл мэндийн сайд С.Энхболд, Сангийн сайд Б.Жавхлан, ХӨСҮТ-ийн захирал Л.Баттөр нар хамтран мэдээлэл хийлээ. 

Шадар сайд С.Амарсайхан "Нөхцөл байдлыг та бүхэн мэдэж байгаа. Бид Гуравдугаар сарын 29-ний өдөр хүртэл шар түвшнээс улбар шар түвшинд шилжиж ажиллаж байгаа. 

Цаашид хатуу хөл хориог тогтоохгүйгээр Дөрөвдүгээр сарын 5-н хүртэл одоо байгаа улбар шар түвшиндээ байхаар шийдлээ.​

Засгийн газар, УОК-ын зүгээс аль болох аж ахуйн нэгж, иргэдийн үйл ажиллагааг хязгаарлахгүйгээр ажиллаж байна.

Үйлдвэр, үйлчилгээний байгууллагуудад цаг болон үйл ажиллагаанд зарим зохицуулалтыг хийх, халдвар хамгааллын дэглэмийг баримталж биелүүлэх тал дээр хаа, хаанаа анхаарч ажиллах, 14 хоногийн хугацаанд халдварын эрсдэл гаргахгүй байхаар зөвлөмж, зөвлөгөөнүүдийг гаргахаар шийдвэрлэлээ. Маргааш Засгийн газрын хуралдаанд танилцуулна.

Хэдийгээр халдварын тоо нэмэгдэж байгаа ч явуулын эмчилгээний багийг гаргах ажлууд зохион байгуулагдаж эхэлсэн учраас хатуу хөл хориог зохион байгуулахгүй гэж үзлээ” гэв.