Өчидөр буюу Гуравдугаар сарын 18-ны өдөр УОК-ын хэвлэлийн төлөөлөгч Ц.Ганзориг "Халдварын тохиолдлын тоо өдөрт 200-г даваад эхэлбэл бүх нийтийн хөл хорио тогтоохоос өөр аргагүй" гэж мэдэгдсэн билээ.
Тэгвэл энэ талаар МУИС-ийн багш нар математик тооцоолол хийж, цаг хугацааны хувьд дараагийн долоо хоногийн төгсгөлөөр 200 гарч эхлэх бөгөөд долоо хоногийн дундаж тоо 200 болох хугацаа ирэх Дөрөвдүгээр сарын 1-нд гэж тооцоолжээ.
Мөн халдвар тараагчийн байршил тодорхойгүй бол хэсэгчилсэн хөл хорио халдвар тархалтын хурдыг бууруулж чадахгүй, нийтийг хамарсан хөл хориог эрт тавих тусам үр нөлөө их байдаг гэж тодотгосон байна.
Урьдчилсан байдлаар Улаанбаатар хотод Гуравдугаар сарын 20-наас 28-ныг дуустал ес хоногийн халдвар тархалтын хурдыг сааруулах зорилгоор бүх нийтийн бэлэн байдал тогтоох санал гаргажээ.
Тодруулбал, албан байгууллагууд ажлын тав, амралтын дөрвөн хоног буюу нийт ес хоногийн хөл хорионы стратеги хэрэгжүүлэх шаардлагатай гэсэн зөвлөмжийг МУИС-ийн багш нар УОК-т хүргүүлсэн байна.
