Эрүүл мэндийн сайдын зөвлөмж, Нийслэлийн Онцгой комиссоос өгсөн чиглэлийн дагуу Хан-Уул дүүргийн 15 дугаар хорооны нутаг дэвсгэрт байрлах “Рапид харш” хотхонд 2021 оны 3 дугаар сарын 18-ны өглөөний 06:00 цагаас эхлэн 72 цагийн хугацаатай хэсэгчилсэн хязгаарлалт тогтоожээ.
Уг байршилд 2021 оны хоёрдугаар сарын 1-ний өдрөөс хойш коронавирусийн халдварын 36 тохиолдол бүртгэгдсэн тул хэсэгчилсэн хязгаарлалт тогтоож, хотхоны бүх өрхөөс PCR шинжилгээ авч, вакцинжуулалтад хамруулж эхэллээ.
Өчигдөр буюу 2021 оны 18-ны “Рапид харш” хотхоны 3607 иргэнээс PCR шинжилгээ авч сорьцыг хүргүүлжээ. Мөн ариутгал, халдваргүйтгэлийг “Санхими” ХХК нь хийж гүйцэтгэн, мэргэжлийн байгууллагууд хяналт тавьж ажилласан байна.
Байр, орцны хог тээвэрлэлт, цэвэрлэгээ үйлчилгээг СӨХ-ны үйлчлэгч хамгаалах хувцас, хэрэгсэл өмсөж хогийг цуглуулан, зориулалтын хогийн цэгт хаяж, цэвэрлэгээ хийжээ. Халдварын аюултай болон ахуйн хог хаягдлыг тусгай зөвшөөрөл бүхий мэргэжлийн байгууллага авч халдваргүйтгэл хийж, ачиж тээвэрлэх арга хэмжээ авч ажилласан тухай Хан-Уул дүүргийн Онцгой комиссоос мэдээллээ.
