МУИС-ийн Хувийн эрх зүйн тэнхимийн багш, доктор Д.Янжинхорлоо   хуурамч гарын үсэг бүхий бичиг баримт үйлдэн бусдын эд хөрөнгийг завшсан гэх үндэслэлээр хуулийн байгууллагаар хоёр жил дамжин шалгагдаж байна.

Хуульч эмэгтэй нас барсан хүний үл хөдлөхийн гэрчилгээг дахин шинээр гаргуулж өөрийн нэр дээрээ авсан гэх хоёр ч хэрэгт холбогдсон боловч хуулийн салбарт өндөр албан тушаал эрхэлдэг ангийн найз нөхдөө татан оролцуулж, хэргээс мултарсан тухай мэдээлэл хэвлэлээр цацагдаж эхэллээ.

                 Нэг ангийн найзууд "хонгилдсон" уу?

М.Чинбат /Улсын ерөнхий прокурорын орлогч. Д.Янжинхорлоотой нэг анги/

М.Чинбат нь Д.Янжинхорлоогийн хэрэг дээр оролцон УЕП-ын нэрийн өмнөөс 02.09-ний өдрийн № 1/368 тоот  үйлдэж “Д.Янжинхорлоогийн үйлдэл эд хөрөнгйн өмчлөлд шинээр өмчлөгч нэмэх ба хасах Эрүүгийн хуульд заасан залилах гэмт хэргийн шинжгүй гэж дүгнэн, прокуророос хэргийг хааж шийдвэрлэсэн нь хууль зүйн үндэслэлтэй байгаа тул гомдлыг хүлээн авахаас татгалзсан шийдвэрийг гаргаж байна” гэх дүгнэлтийг  гаргажээ.

Д.Энхтөр /Улсын ерөнхий прокурорын газрын Ял эдлүүлэх ажиллагаанд хяналт тавих хэлтсийн дарга. Мөн Д.Янжинхорлоотой нэг анги/

Тэрээр  Сүхбаатар дүүргийн ерөнхий прокуророор ажиллаж байсан ба Нийслэлийн ерөнхий прокурорын албан тушаалд яригдаж байсан нэгэн.

Д.Янжинхорлоогийн хэрэг дээр Сүхбаатар дүүргийн ерөнхий прокурорын хувьд шийдвэр гаргалтыг хянах бүхий албан тушаал хашиж  байжээ.

Ц.Батболд /Баянзүрх дүүргийн ерөнхий прокуророор ажилладаг. Д.Янжинхорлоогийн нэг анги/

Прокурор С.Батболдыг иргэн Ц.Буяндорж, дуучин Т.Ариунаа нарын хэрэг дээр авлига нэхэж, хууль бус асуудал гаргасан гэх прокурорын нэг. 

Ц.Батболд нь Д.Янжинхорлоотойгоо цуг ажиллаж, МУИС-д “Эрүүгийн хууль, тогтоомжийн хэрэглээ”, “Прокурорын хяналт” зэрэг хичээлүүдийг зааж, гэрээт багшаар ажилладаг.

Б.Батсүрэн /Нотариачт. Д.Янжинхорлоогийн нэг анги/

Сүхбаатар дүүрэгт байрлах, үйлчилгээний зориулалттай 6 давхар обьектийн гуравдугаар давхар нь О гэх иргэний нэр дээр бүртгэгдсэн, өмчлөх эрхийн гэрчилгээтэй байжээ.

Гэтэл Д.Янжинхорлоо нь 2009 оны аравдугаар сарын 16-ны өдөр гарын иргэн О-ийн гарын үсгийг хуурамчаар үйлдэн нотариатч М.Саранцэцэгээр баталгаажуулж, Үл хөдлөх хөрөнгийн гэрчилгээг хүчингүй болгон өөрийн нэрийг хамтран өмчлөгчөөр нэмж бүртгүүлсэн байна.

Үүнээс 20 хоногийн дараа буюу 2009 оны арваннэгдүгээр сарын 11-нд дахин хуурамч гарын үсэг үйлдэж, өмнөхийн адил өөрийг нь байлцуулалгүйгээр нотариат дээр очиж, иргэн О-г хамтран өмчлөгчөөс хасах хэлцлийг нотариатч Р.Онончимэгээр /Монголын нотариатчын танхимын ерөнхийлөгч/ батлуулсан байна. Ийнхүү өмчийн эзэн нь мэдээгүй байхад сарын дотор хоёр удаа хуурамч бичиг баримт үйлдэн бусдын өмчийг булаасан байна.

Д.Янжинхорлоогийн үйлдсэн хуурамч гарын үсгийг Шүүхийн шинжилгээний үндэсний хүрээлэнгээр шинжлүүлэхэд “О-гийн гарын үсэг, бичгийн хэвтэй тохирохгүй, гарын үсэг биш байна” /2019 оны 04 дүгээр сарын 17-ны өдрийн ...тоот дүгнэлт/ хэмээн хуурамч болохыг тогтоожээ.

Хохирогч тал Д.Янжинхорлоогийн энэ үйлдлийг хуулийн байгууллагаар шалгуулсан авч прокурорын байгууллагаас “Хуурамч бичиг үйлдэх, ашиглах нь гэмт хэргийн шинжтэй үйлдэл мөн боловч хэргийн хөөн хэлэлцэх хугацаа дууссан” хэмээн үзэж хэргийг хаасан юм байна.

Д.Янжинхорлоогийн энэ хэрэгт түүний ангийн найз, Сүхбаатар дүүргийн ерөнхий прокурор асан Д.Энхтөр, Улсын ерөнхий прокурорын орлогч М.Чинбат нар оролцож шийдвэр гаргалтад нөлөөлсөн байхыг ч үгүйсгэх аргагүй юм.

Тухайлбал, Улсын ерөнхий прокурорын орлогч М.Чинбат энэ оны хоёрдугаар сарын 9-ны өдөр 1/368 тоот тушаал үйлдэж, “Д.Янжинхорлоогийн үйлдэл эд хөрөнгийн өмчлөлд шинээр өмчлөгч нэмэх, хасах хэлцлээс үүссэн иргэний хэрэг шүүхэд хянан шийдвэрлэх ажиилагааны журмаар шийдвэрлэгдэх асуудал, Эрүүгийн хуульд заасан залилах гэмт хэргийн шинжгүй гэж дүгнэн, прокуророос хэргийг хааж шийдвэрлэсэн нь хууль зүйн үндэслэлтэй байгаа тул гомдлыг хүлээн авахаас татгалзсан шийдвэрийг гаргаж байна” гэсэн байна. Ангийн анд Д.Энхтөр нь харин энэ хэрэгт хянат тавих эрх бүхий албан тушаалтнаар ажиллаж байв.

Сануулахад, УЕП-ын дэргэд хэвлэл мэдээллийн хэрэгслээр нийтэд мэдээлэгдсэн болон мөрдөн шалгагдаж байгаа хууль, хяналтын байгууллагын ажилтнуудтай холбоотой гомдол, мэдээлэл хэргийг хянаж, шуурхай шалгаж шийдвэрлүүлэх Ажлын хэсэг байгуулагдан ажиллаж байгаа. 

УЕП-ын зүгээс хуулийн байгууллагынханы хууль бус ажиллагаа иргэдийг хохироож буй асуудалтай тэмцэж эхэлсэн нь сайшаалтай ч хажуудаа байгаа хамгийн ойрын хүн болох орлогч прокурор М.Чинбат нарын ангийн найз нөхдийн холбоо, хулгайн сүлжээг анхааралдаа авч, прокурор нартай хариуцлага тооцоосой хэмээн үүнийг бичив.

А.Гэрэл