Нийслэлийн хэмжээнд коронавируст цар тахлын эсрэг дархлаажуулалтын ажлыг эрчимжүүлээд байна. 

Өнөөдөр Улсын Хоёрдугаар төв эмнэлэгт коронавирусийн халдварын эсрэг вакциныг Хотын дарга Д.Сумъяабазар, Шадар сайд С.Амарсайхан нар хийлгэлээ. Тэд БНХАУ-ын Синофарм вакциныг хамт хийлгэсэн байна. 

2021 оны Хоёрдугаар сарын 23-ны өдрөөс буюу дархлаажуулалт эхэлснээс хойш нийт 26 мянга гаруй иргэнийг хамруулаад байна.

Хуваарийн дагуу өнөөдөр Хил хамгаалах, Улаанбаатар цахилгаан түгээх, эрүүл мэндийн салбар, тохижилт үйлчилгээ, цэвэрлэх байгууламж, Дотоод хэргийн их сургууль зэрэг байгууллагын ажилтан, алба хаагчдыг дархлаажуулж байна.

Дархлаажуулалтыг 1800 ажилтан, сонсогчид урьдчилсан үзлэг, эрүүл мэндийн бүртгэл хийн дархлаажуулж, биеийн байдлыг нь 15-30 минут ажиглаж байна. Одоогоор вакцины сөрөг урвал үзүүлсэн тохиолдол гараагүй байна.

Гэхдээ тухайн хүний биеийн онцлогоос хамаарч толгой өвдөх, дотор муухайрах, халуурах, вакцин хийлгэсэн газарт бага зэрэг хавдах зэрэг шинж тэмдэг илэрч болзошгүйг эмч, мэргэжилтнүүд сануулж байна.