Нью-Йоркийн шүүх гэх хэрэг нь анхнаасаа захиалгатай гүтгэлэг болох тухай яригдаж байгаа. Үүнтэй холбоотойгоор Нийслэлийн прокурорын газрын ерөнхий прокурорын орлогч Ц.Насанбат саяхан “Насанбат: С.Батболд нарын хөрөнгийг царцаах, битүүмжлэх ажиллагаа гаднын зургаан орны шүүхэд зэрэг явагдаж байгаа” нэртэй ярилцлага өгчээ. Энэ ярилцлагатай холбогдуулан С.Батболдын хуульч дараах тайлбар, няцаалтыг өгсөн байна.

С.Батболдын өмгөөлөгч Х.Жаргалсайхан энэхүү албан мэдэгдэлдээ “Төрийн нэрийн өмнөөс үйл ажиллагаа явуулдаг прокурорын байгууллага, олон нийтийн итгэлийг хүлээдэг хуульч мэргэжлийн нэр хүндийг ашиглаж хэвлэл мэдээллийн хэрэгсэл, олон нийтийн сүлжээгээр хууль тогтоомж, прокурорын ёс зүйн хэм хэмжээг илтэд зөрчсөн, үндэслэлгүй мэдээллийг нийтэд тараалаа.

Ц.Насанбат Та Монгол Улсын эрх зүйн тогтолцоонд нэн чухал байр суурийг эзэлдэг иргэний хэрэг шүүхэд хянан шийдвэрлэх ажиллагааны зарчим, журмыг гажуудуулсан үйл ажиллагаа явуулж байгаа тань шүүхэд нэхэмжлэлийг бусдын өмнөөс хууль зөрчиж дураараа гаргасан, мөн нэхэмжлэл, түүнд хавсаргасан баримт бичгүүдэд “маш нууц” гэсэн тэмдэг даран шүүх ажиллагааг хаалттай, нууц байдалд оруулж, үүнийгээ ашиглан нийгэмд үл ойлгогдох нөхцөл байдлыг бий болгосноор эхэлсэн.

Бид эл шударга ёсонд үл нийцэх, хууль бус үйл ажиллагааны талаар шүүхэд хүсэлт, гомдол гаргасны үр дүнд мэргэжлийн шинжээч ажиллаж, Таны шүүхэд гарган өгсөн нэхэмжлэл, баримт бичгүүдийг төрийн “маш нууц” зэрэглэлийн баримт бичиг биш болохыг тогтоосон байдаг.

Гэтэл Та ярилцлагадаа өөрийн хууль бус үйл ажиллагаагаа далдалж тухайн баримт бичгүүдийг хөндлөнгийн хэн нэгэн шүүхэд гаргаж өгсөн юм шиг, түүнийг нь мэргэжлийн шинжээч төрийн нууц эсэхийг нь тогтоож, нээлттэй болгосон мэтээр нийтэд учирлаж, төрийн нууц биш гэсэн дүгнэлт гарсан учраас олон нийтэд хандан мэдээлэл хийж байна гэсэн байна. Ингэхдээ мөн л хүний эрхийг ноцтойгоор зөрчиж, аль ч улсын шүүхээс гэм буруутай асуудлыг тогтоогоогүй, бүр энэ талаар хэлэлцээ ч үгүй байхад хууль зөрчсөн гэм буруутай мэтээр зориудаар гүтгэсэн байна” гэх утга бүхий албан мэдэгдэл гаргажээ.

Түүнчлэн Ц.Насанбат прокурорыг иргэний хэрэг хянан шийдвэрлэх ажиллагаанд нөлөөлөх гэсэн оролдлогоо зогсоохыг албан ёсоор шаардаж байна гэв.

Дашрамд дурдахад, Ц.Насанбат прокурор нь Монгол Улсын Засгийн газар, Төрийн өмч бодлого зохицуулалтын газар, “Эрдэнэт үйлдвэр”, “Эрдэнэс Оюу толгой” газруудын нэрийг барьж Сү.Батболдтой холбоотойгоор ямар нэгэн гомдол гаргаагүй байхад нь дээрх байгууллагууд гомдол гаргасан мэтээр хуурамч албан бичгийг үйлдэж Нью-Йоркийн шүүх рүү анх явуулсан хууль бус хэрэгт ороогдоод байгаа билээ.

Прокурор Ц.Насанбат нь хуулийг удаа дараа зөрчиж, хууль хяналтын байгууллагын ёс зүйн хэм хэмжээгээ илэрхий зөрчиж, ингэхдээ Монгол Улсын Засгийн газрын нэрийг барьсан нь ноцтой үйлдэл бөгөөд энэхүү хууль бус үйлдлээ зогсоохыг зохих газруудаас албан ёсоор шаардаж эхлэв.

Ц.Насанбат прокурор нь төрийн хууль хяналтын байгууллагын албан тушаалаар түрий барьж, Монгол Улсын үндэсний хууль тогтоомж нийтэд тэгш үйлчлэх эрхийг ноцтойгоор зөрчиж, шүүхээр тогтоогдоогүй, зохиомол асуудлаар ярилцлага гаргаж, нийтэд худал мэдээлэл тараасан тул прокурорын ёс зүйн хэм хэмжээгээ зөрчсөн гэх үндэслэлээр холбогдох журмын дагуу шалгагдаж болзошгүй болжээ.

Б.Анхмаа