УОК-оос нийслэлд тогтоосон хөл хориог 2021 оны Хоёрдугаар сарын 23-наас сулруулж, үйлчилгээний байгууллагуудаа 95 хувьтай нээх болсон тухай мэдээллээ.

Мөн коронавируст халдварын тархалтын түвшинг тогтоож, хэрэгжүүлэх үйл ажиллагааг зохицуулах түр журам бэлэн болсныг мэдээллээ. 

Шадар сайд С.Амарсайхан "УОК-оос цар тахлын үеийн зохион байгуулалт бодлого шийдлийг гаргаж, шаардлагатай арга хэмжээг авч байна. Монгол Улсын засгийн газар эрүүл мэндээ хамгаалах, эдийн засгаа эрчимжүүлэх ажлыг халдвар хамгааллын дэглэмээ сахин зэрэг явуулах байр суурьтай байгаа. Энэ хүрээнд 12 хоногийн хугацаанд "Нэг өрх-нэг иргэн" PCR шинжилгээг зохион байгуулж байна. Бидний гурван үе шаттай авч хэрэгжүүлэх арга хэмжээний эхний хэсэг. Харьцангуй үр дүнтэй зохион байгуулагдаж байгаа.

Мөн иргэдээ вакцинжуулах ажлын бэлтгэлийн хангаж байна. Хоёрдугаар сарын 23-ны өдрөөс вакцинжуулалтын ажил эхэлнэ.

Хоёрдугаар сарын 23-наас ажил, амьдралын хэвийн горимд шилжих буюу ААН-үүдийн 95 хувийн үйл ажиллагааг эхлүүлэх, тэдгээртэй холбоотой дэглэм, журмыг бэлэн болголоо.

Энэ хүрээнд Засгийн газраас хэрэгжүүлж буй 10 их наядын бодлого шийдвэр үргэлжлэн хэрэгжинэ. ААН-үүдийн 95 хувийн үйл ажиллагаагааг хэвийн явуулна.

Бүх нийтийн бэлэн байдлын зэргийг Өндөржүүлсэн бэлэн байдлын зэргийн түвшинд шилжүүлж байгаа. Хэвийн горимд шилжиж байгаатай холбогдуулан цар тахлын түвшин тогтоох, хэрэгжүүлэх үйл ажиллагааг зохицуулах түр журмыг боловсруулсан. Ингэснээр онцгой комиссын байгууллагууд шат, шатандаа ямар арга хэмжээ авч хэрэгжүүлэх болон уялдаа холбоо сайтай, тодорхой дүрэм журмыг мөрдөж ажиллана. Журмыг боловсруулахад 13 чиглэлийн 86 байгууллага оролцлоо.

Гамшгаас хамгаалах тухай хуульд зааснаар гурван зэрэглэлд ангилж байна.

Тухайлбал, төрийн байгууллагууд аль зэрэглэлд байх, хязгаарлах үйл ажиллагааг ч тодорхой болгосон.

Дөрөвдүгээр түвшин буюу улаан: Энэ нь бидний өнөөдрийн байгаа хөл хорионы зэрэглэлийн түвшин.

Гуравдугаар түвшин буюу  шар: Халдвар голомтот тархалттай.

Хоёрдугаар түвшин буюу шар: Зөөвөрлөгдсөн буюу алаг цоог тархалттай. Хоёрдугаар сарын 23-наас бид шар түвшин рүү орно. Ингэснээр зарим халдвар голомтолсон газар хэсэгчилсэн хязгаарлалт хийнэ. Үүнээс бусад тохиолдолд ААН, хуулийн этгээдийн үйл ажиллагаа хэвийн явагдана.

Түвшин бүрт ААН, байгууллагын баримталж ажиллах зарчмыг тодорхой зааж өгсөн байгаа. УОК болон эрүүл мэндийн байгууллагаас халдварын тархалт эрсдэлийн үнэлгээнд суурилан түвшинг зарлана. Энэ үед түвшинд заасны дагуу үйл ажиллагаа явуулах юм. Иргэн, ААН-үүдийг хариуцлагажуулж байна. Бүгд хичээж ажиллах нөхцөлийг бүрдүүлж ажиллана" гэлээ.