Өнөөдөр Эрүүл мэндийн яамны ээлжит мэдээллийн үеэр Засгийн газрын Хэвлэл мэдээлэл, олон нийттэй харилцах хэлтсийн дарга, УОК-ын хэвлэлийн төлөөлөгч Ц.Ганзориг өнөөдөр татан авалт нь эхэлсэн коронавирусийн эсрэг вакцин болон үйл ажиллагааг нь эхлүүлээд буй хүнсний бөөний 24 төвтэй холбоотой мэдээллийг өглөө. 

"Иргэдэд үйл ажиллагаагаа нээсэн хүнсний захуудыг зорьж, сул хөдөлгөөн үүсгэхгүй байхыг анхааруулав"

Тэрээр "Өнөөдөр нэр бүхий хүнсний бөөний 24 төв үйл ажиллагаагаа эхлүүлж байна. Тухайн төвүүдийн үйл ажиллагаагаа нээж байгаа гол зорилго нь Улаанбаатар хотын айл өрхүүдийн хүнсний бүтээгдэхүүнийг тасалдуулахгүй нийлүүлэхд байхад оршиж байгаа. Өөрөөр хэлбэл, тухайн бөөний төвүүдээс Улаанбаатар хотын зургаа болон найман нэрийн 4000 орчим хүнсний дэлгүүр бараагаа татан авна гэсэн үг.

Иймд иргэд үйл ажиллагаагаа нээсэн хүнсний захуудыг зорьж сул хөдөлгөөн үүсгэж явахгүй байхыг анхааруулъя.

Тодруулбал, хүнсний дэлгүүрүүдийн нийлүүлэлт хомсдож байгаатай холбоотойгоор хүнсний бөөний төвүүдийг өнөөдрөөс шат дараатайгаар нээж байгаа тул иргэд зөвхөн гэрийнхээ ойролцоох хүнсний дэлгүүрээр үйлчлүүлэхийг хүсье.

"Нэг хаалга-Нэг шинжилгээ" үйл ажиллагаа эхлээд таван өдөр өнгөрлөө. Одоо дахиад долоо хоног үлдсэн. Үлдсэн хоногууддаа бид хаа, хаанаа хариуцлагатай, тэвчээртэй байх хэрэгтэй.

Хэдийгээр таны гэрийн ойролцоох дэлгүүрүүд үнийн зөрүүтэй, сонголт багатай байсан ч өнөөдрөөс бөөний төвүүд нээгдэж хүнсний хангалт хэвийн болох тул гэртээ байхыг уриалж байна" гэлээ.

"Коронавирусийн эсрэг вакциныг иргэдэд өөрсдийнх нь сонголтоор хийнэ"

Тэрээр үргэлжлүүлэн “Өнөөдөр AstraZeneca вакциныг албан ёсоор ДЭМБ зөвшөөрчээ. Ингэснээр КОВАКС хөтөлбөрийн хүрээнд дэлхий нийтээр дархлаажуулах ажлыг эхлүүлж болно гэсэн үг юм. Тиймээс Монгол Улсад орж ирэх AstraZeneca компанийн вакцин нь ДЭМБ-ын албан ёсны зөвшөөрөлтэй гэж ойлгож болно.

Мөн ДЭМБ-аас зөвшөөрсөн, зөвшөөрлөө хүлээж байгаа хэд хэдэн вакцин бий. Иргэд ОХУ-ын вакциныг авах эсэхийг их асууж байна.

Манай улс хойд хөрштэйгөө олон удаагийн яриа хэлцэл хийсний үр дүнд “Cпутник V” вакциныг ДЭМБ зөвшөөрсний дараа шат дараатайгаар оруулж ирж, иргэдэд сонголттойгоор хийнэ. Мөн БНХАУ-ын Сенефарм компанийн хөгжүүлсэн вакциныг авахаар бэлтгэл ажлаа хангаж байна.

Энэ мэтээр дэлхий дахинд үр дүн нь онол практикийн хувьд гараад явж байгаа вакцинуудыг иргэдэд өөрсдийнх нь сонголтоор хийх болно" гэсэн юм.

"Манай улс тусгай үүргийн нислэгээр ирэх иргэдээ ч коронавирусийн эсрэг вакцинд хамруулна"

"Гадаадаас чартер нислэгээр ирж байгаа иргэдээ ч мөн коронавирусийн эсрэг вакцинд хамруулна. 

Шатлалын хувьд эрүүл мэндийн ажилтан, архаг хууч өвчтэй хүмүүс, хөл хориог сахиулж байгаа алба хаагчид, өндөр настнуудыг түрүүлж хамруулна. Ийм шатлалаар гадаадаас ирж байгаа иргэд маань хамрагдаад явах болно.

Коронавирусийн эсрэг вакцинжуулалтад Монгол Улсын насанд хүрсэн хоёр сая орчим иргэн бүгд хамрагдана гэдгийг хэлье. Монгол Улсын хүн амын 40 хувь нь хүүхэд учраас хүн амынхаа 60 хувийг буюу насанд хүрсэн иргэдээ вакцинжуулна гээд байгаа юм.

Дэлхий нийтэд одоогоор коронавирусийн эсрэг хүүхдэд тарьж болох вакциныг эцэслэн шийдээгүй байна” гэв.