Улсын Онцгой комиссоос “Нэг өрх-нэг шинжилгээ”-ны талаар мэдээллэл хийлээ. 

Хоёрдугаар сарын11-ээс эхэлсэн шинжилгээнд нийт 91 мянган иргэнд хамрагджээ. Эдгээр шинжилгээнээс 4 хүнд коронавирусийн халдвар илэрсэн байна.

Эхний ээлжинд хоёрдугаар сарын 11-13-ны хооронд  нийслэлийн халдварын идэвхтэй бүс буюу улаан бүсэд байгаа 134 блокийн айл өрхүүдээс шинжилгээ авч байгаа бол хоёрдугаар сарын 13-наас хойш үлдсэн өрхүүдэд шинжилгээг хийх юм байна.

УОК-ын хэвлэлийн төлөөлөгч Ц.Ганзориг "Нэг хаалга-нэг шинжилгээ аян"-ы хүрээнд энэ сарын 11, 12-нд нийт 91 мянган хүнээс PCR шинжилгээ авахад нийт 4 тохиолдол \өчигдөр 2, өнөөдөр 2\ илэрлээ. Өнөөдөр ХӨСҮТ-ийн тусгаарлах байранд тусгаарлагдаж байсан хүмүүсээс 44 тохиолдол илэрч, айл өрхүүдээс авсан шинжилгээгээр хоёр нь  БЗД, Сонгинохайрхан дүүргээс илэрсэн. 

Хоёр өдрийн 86 тохиолдлын дөрөв нь массын дундаас илэрсэн тохиолдол юм. Өөрөөр хэлбэл, массын дунд халдвар харьцангуй нам жим байна гэж үзсэн" гэлээ. 

Мөн тэрээр үргэлжлүүлэн хатуу хөл хорионы үед үйл ажиллагааг нь зөвшөөрсөн 14 салбар, чиглэлийн ажилтнуудаас PCR шинжилгээний хариуг шаардахгүй болохыг хэллээ. 

Учир нь өнөөдөр цагдаагийн алба хаагчид үүн дээр нэмж PCR шинжилгээний хариуг үндэслэн хөдөлгөөнд оролцуулахаар болсон гэх мэдээллийг өгсөн билээ. Харин уг мэдээллийг Улсын Онцгой комиссоос үгүйсгэлээ.

Энэ талаар Хэвлэлийн төлөөлөгч Ц.Ганзориг "Зөвшөөрөгдсөн 14 салбарын ажилтнуудаас PCR шинжилгээний хариу шаардаж байна гэсэн. Ийм зүйл байхгүй. Энэ мэт ойлголтын зөрүүтэй асуудлыг засаж залруулж байна. Зарим нэг алдаа дутагдал гарч байгаад дахин хүлцэл өчиж байна. Хүний хүчин зүйл хандлагын асуудлаас зарим нэг алдаа гарч байна. УОК-оос хүнс тээвэр, хэвлэл мэдээлэл зэрэг шаардлагатай үед ажиллаж байгаа салбарын ажилтнуудыг шат дараатай PCR шинжилгээнд хамруулахаар ажиллаж байна. Удахгүй хуваарь зарлах болно" гэсэн юм.

Монгол улсын хэмжээнд халдварын батлагдсан тохиолдол 2293 боллоо.