Нийслэлийн Онцгой комиссын Шуурхай штабын Удирдлагын багийн гишүүн Э.Эрдэнэбаатар орон нутгийн иргэдийг нутаг буцаахтай холбоотой мэдээлэл өглөө.

Улаанбаатар хотод гацсан орон нутгийн иргэдийг сар шинийн баяраас өмнө нутаг буцаах ажлыг зохион байгуулахаар болсон. Энэ хүрээнд Хоёрдугаар сарын 5-наас эхлэн орон нутгийн хаягтай иргэдийг Улаанбаатараас гаргах ажлыг зохион байгуулж байна.

Орон нутаг руугаа буцах хүсэлтэй Улаанбаатар хотод байгаа иргэд аймгийнхаа Онцгой комиссын Шуурхай штабт хотоос гарах хүсэлтээ гаргах ёстой. Ингээд аймгийн Шуурхай штабаас Нийслэлийн онцгой комисс руу тухайн иргэдийн нэрийг ирүүлнэ. Нэр нь ирсэн иргэн PCR шинжилгээ өгсөн тохиолдолд шалган нэвтрүүлэх товчоогоор хотоос гарах юм. Ингэхдээ мөн хувийн унаагаараа гарч болно. 

Энэ сарын 9-ний өдрийг дуустал орон нутгийн  иргэдийг хүсэлтийнх нь дагуу нутаг буцаах ажлыг зохион байгуулна. НОК-ын Шуурхай штабын 11321731, 11324207 дугаарын утсаар иргэдэд мэдээлэл, зөвлөгөө өгч байна.

Дашрамд, Шадар сайд С.Амарсайхан “Бүх нийтийн бэлэн байдалд шилжсэн үед зөвхөн онцгой обьёкт, төрийн зайлшгүй үйл ажиллагаа явуулах үйлдвэр үйлчилгээний байгууллагын ажилтан, албан хаагчид ажлын газрын үнэмлэх, зөвшөөрлөөр хөдөлгөөнд оролцоно. Давхар хяналт явна гэж ойлгох хэрэгтэй. Өмнө нь QR кодтой холбоотой олон асуудал гарч байсан.

Мөн энэ үеэр хөдөө орон нутгаас Улаанбаатар руу, Улаанбаатараас хөдөө орон нутаг руу зорчихгүй. Орон нутагт бол хатуу хөл хорио тогтоогоогүй ч зөвхөн Цагаан сарын баярыг тэмдэглэхгүй байх хэрэгтэй гэх Засгийн газрын тогтоолыг хэрэгжүүлнэ" гэсэн билээ.

Иргэд хаана хандаж, ямар шинжилгээ, бичиг баримт бүрдүүлсэн байх талаарх дэлгэрэнгүй мэдээллийг хүргэж байна.