Шадар сайд С.Амарсайхан энэ сарын 4-ний өдөр Эрүүл мэндийн яам, Шуурхай штаб, илрүүлэг шинжилгээ авч буй цэгүүд дээр ажиллав. Тэрээр ажлын явцтай танилцах үеэрээ яамныханд үүрэг даалгавар өглөө.
Шадар сайд С.Амарсайхан "Шинжилгээ авах байрыг 09-17 цагийн хооронд ажиллах чиглэлийг ямар байгууллага өгсөн юм. Шинжилгээний цэгүүд бүрэн хүчин чадлаар ажиллахгүй байна. Газар дээрээ 40 хувь л ажиллаж байна. Цаана нь дахиад 60 хувийн хүчин чадал байна. Ажиллаж байгаа хүмүүс нь ч тэрийгээ хэлж байна. Улс орны аюулгүй байдал, онцгой нөхцөлд хүн амын аюулгүй байдал, эрүүл мэндийн ноцтой асуудал яригдаж байхад яагаад шинжилгээний цаг ийм богино байгаа юм. Цаана чинь хэдэн зуун мянган хүн шинжилгээ өгөх шаардлагатай бүр цөхрөнгөө барчихсан байхад бид энд амралтын юм шиг, эсвэл сайн дурынхан шиг ажиллаад байж болохгүй. Улсын хэмжээнд цар тахал хүнд нөхцөлд байна.
Иргэд олон шалтгаанаар шинжилгээний цэгийг зорьж байгаа. Хөдөө орон нутаг руу буцах иргэд шинжилгээний асуудлаас болж хоригдож, хүндрэлтэй байдалд орж байна.
Гэтэл шинжилгээний цэгүүд бүрэн бүрэлдэхүүнээрээ ажиллахгүй, ойлгомжгүй байгаагаас иргэд бөөгнөрөх асуудал үүсч байна. Шинжилгээ өгөхөөр очих иргэд цаг авах ёстой юу, эсвэл очиод оочирлох ёстой юу. Үүнд эцсийн шийдвэр мэдээлэл хэрэгтэй байна. Хүнд цар тахалтай нөхцөлд ажиллаж байгааг ойлгож байна. Гэхдээ сайн дурын ажил биш шүү дээ. Тиймээс шинжилгээ өгөх байруудад анхаарч, хариуг хурдан гаргах дээр бүх нөөц бололцоогоо дайчлан ажилла. Сорьцыг тухай бүрт нь явуулж хариуг нь яаравчла. Шинжилгээ авах цагийг уртасга" гэв.
