УОК-оос Цагаан сарын баярын өдрүүдэд буюу хоёрдугаар сарын 11-нээс 23-ны 06.00 цаг хүртэл нийслэлд хатуу хөл хорио тогтоохоор болсон. 

Харин хөл хорионы үед ажиллахаар зөвшөөрөгдсөн 10 төрлийн байгууллагын ажилчид ажлын газрын үнэмлэх, зөвшөөрлөөр хөдөлгөөнд оролцох юм. 

Дараах байгууллагын ажилчид хөдөлгөөнд оролцоно.

1. Цахилгаан, дулаан, ус хангамж, ариутгал татуургын үйл ажиллагаа;

2. Эрүүл мэндийн байгууллага;

3. Шатахуун түлшний хангамжийн үйл ажиллагаа;

4. Хүнсний үйлдвэрлэл, худалдаа, тээвэрлэлт түгээлт;

5. Ариутгал халдваргүйжүүлэлт, хог хаягдлын цэвэрлэгээ;

6. Хэвлэл мэдээлэл;

7. Харилцаа холбоо, шуудан;

8. Банкны цахим болон автомат тооцооны машины үйл ажиллагаа;

9. Шуудан харилцаа холбоо;

10. Сайжруулсан түлшний үйлдвэрлэл, нийлүүлэлт, түгээлт зэрэг болно. 

Дээрх байгууллагын ажилчид нийтийн тээврээр 07.00-10.00, 17.00-20.00 цагийн хооронд үйлчлүүлнэ. Ингэхдээ ажлын үнэмлэх, иргэний үнэмлэхээ биедээ авч явах юм.

Энэ талаар Шадар сайд С.Амарсайхан “Бүх нийтийн бэлэн байдалд шилжсэн үед зөвхөн онцгой обьёкт, төрийн зайлшгүй үйл ажиллагаа явуулах үйлдвэр үйлчилгээний байгууллагын ажилтан, албан хаагчид ажлын газрын үнэмлэх, зөвшөөрлөөр хөдөлгөөнд оролцоно. Давхар хяналт явна гэж ойлгох хэрэгтэй. Өмнө нь QR кодтой холбоотой олон асуудал гарч байсан.

Мөн энэ үеэр хөдөө орон нутгаас Улаанбаатар руу, Улаанбаатараас хөдөө орон нутаг руу зорчихгүй. Орон нутагт бол хатуу хөл хорио тогтоогоогүй ч зөвхөн Цагаан сарын баярыг тэмдэглэхгүй байх хэрэгтэй гэх Засгийн газрын тогтоолыг хэрэгжүүлнэ" гэсэн билээ.