МҮБХ-ноос Цагаан сарын баярт зориулсан хүчит бөхийн барилдааныг Улаанбаатар хотноо халдвар, хамгааллын дэглэмийг сахин үзэгчгүй зохион байгуулах хүсэлт гаргасан ч УОК-ын зүгээс боломжгүй хэмээн мэдэгдээд байсан билээ. Учир нь Нийслэлд Хоёрдугаар сарын 11-23-ныг хүртэл 12 хоногийн хатуу хөл хорио тогтоохоор болсон. 

Тэгвэл өнөөдөр МҮБХ-ноос Цагаан сарын бөхийн барилдааныг эрүүл бүс буюу орон нутагт /Говь-Алтай аймаг/ үзэгчгүйгээр зохион байгуулах санал гаргасан юм. 

МҮБХ-ны тэргүүний үүрэг гүйцэтгэгч Ц.Магалжав Нийслэлийн засаг дарга, Нийслэлийн онцгой комиссын дарга Д.Сумъяабазараас сар шинийн бөхийн барилдаанд оролцох 128 бөх болон жаяг дэгийн баг, телевизийн ажилтнуудыг Улаанбаатар хотоос гаргах зөвшөөрлийг хүссэн юм. 

Гаргасан хүсэлтэд, "НОК-оос МҮБХ-нд сар шинийн барилдаанд цахимаар барилдахаар бүртгүүлсэн 128 бөх, орон нутагт очиж ажиллах жаяг дэг, шууд дамжуулах ТВ-ийн ажилтан болох нийт 140 хүний шинжилгээг 2021 оны 02-р сарын 10-ны өдөр Монгол бөхийн өргөөнд авах, 2021 оны 02-р сарын 11-ний өдөр Улаанбаатар хотоос гарч нисэх онгоцны буудлаас Говь-Алтай аймаг руу нисэх хөдөлгөөн, мөн өдрийн орой ирэх хөдөлгөөнийг цар тахлын үеийн дүрэм журмын дагуу шийдвэрлэж өгөхийг хүсье.

Жич: Орон нутагт зохиогдох барилдааны бүх зардлыг МҮБХ бүрэн хариуцах бөгөөд нислэгийн 2 онгоцны захиалгыг өгсөн байгаа болно" гэсэн байв. 

НОК-ын дарга Д.Сумъяабазар хүсэлтийг хүлээн авч, зөвшөөрсөн байна. 

Ингэснээр XVII-р жарны Хаврын тэргүүн сарын сар шинийн баярт зориулсан хүчит бөхийн барилдаан Говь-Алтай аймгаас бөхийн спортыг шимтэн үзэгчдийн мэлмийг баясгахаар болжээ.