Нэгдүгээр сарын 31-ний өдөр Г.Ганчимэг гэх эмэгтэй хувийн инстаграм хаягандаа өөрийн хамтран амьдрагч фитнесс модель, загвар өмсөгч С.Эрдэнэцогтод зодуулсан гэх мэдээллийг нийтэлж удалгүй устгасан байдаг.

Энэ хэргийн талаар Цагдаагийн ерөнхий газрын Хэвлэл мэдээллийн төвийн дарга, цагдаагийн дэд хурандаа Б.Баатархүү “Хан-Уул дүүргийн 11 дүгээр хороонд оршин суух С.Эрдэнэцогт нь нэгдүгээр сарын 28-ны өдрийн 12.00 цагт хамтран амьдрагч Г-г зодсон гэх дуудлага мэдээллийг Хан-Уул дүүрэг дэх цагдаагийн газрын Нэгдүгээр хэлтэс хүлээн авсан. Ирүүлсэн гомдол мэдээллийн дагуу цагдаагийн байгууллагаас холбогдох шалгалтын ажиллагааг явуулж, Монгол Улсын Зөрчлийн тухай хуулийн 5.4 дүгээр зүйлийн 4.1 дэх хэсэгт зааснаар зөрчлийн хэрэг нээж, шүүхээр шийдвэрлүүлэх саналтайгаар хоёрдугаар сарын 3-ны өдөр Хан-Уул дүүрэг дэх прокурорын газарт уг зөрчлийн хэргийг шилжүүлсэн” гэлээ. 

Фитнесс модель, загвар өмсөгч С.Эрдэнэцогт харин өчигдөр "Зэвүүн яриа" ток шоунд оролцох үеэрээ тухайн эмэгтэйд гар хүрсэнээ хүлээн зөвшөөрсөн бөгөөд гэхдээ 3, 4 сарын өмнөх асуудал хэмээн хэлсэн юм. 

Тэрээр "Бие биедээ итгэхгүй байгаа байдал, хардалт, жижиг жижиг хэрүүл ингэж явсаар сүүлдээ үл итгэлцэл үүсээд салаад, "За за, энэ бүхэн дуусч байвал би чиний мууг үзнэ" гэсэн байдал л болоод байна л даа. Би чинь бас хад чулуу биш ээж, гэр бүл, хамаатан сандантай хүн. Би биеэ өмөөрөх гээгүй. Би үнэхээр тэр эмэгтэйг алая, зодоё гэж бодоод цохисон бол өнөөдөр юуун сошил дээр юм тавих. Би чин 192 см өндөр, тэр эмэгтэй 165 см өндөр. Тэр сошил дээр тависан зурагнууд нь дандаа дээр үеийн зураг. Манай ээжээс уучлалт гуйсан байсан. Гэхдээ би багалзуурдаад орлуу шидсэн нь үнэн. Энэ бол маш буруу үйлдэл гэдгийг мэднэ. Тэр гар хүрсэндээ л орно. Би түүнд үнэхээр хайртай. Тэр хайр алга болчихоогүй л байна. Би их уучламтгай, маш их санаж байна" гэлээ.