ЭМЯ-наас зохион байгуулдаг ээлжит мэдээллийн  үеэр "эрдэмтэн судлаачдын дүгнэлт, эрсдэлийн үнэлгээ, ХӨСҮТ-ийн тархвар зүйн судалгаан дээр үндэслэн" сар шинийн баярын үеэр хөл хорио тогтоох саналаа УОК-т хүргүүлсэн тухай мэдээллээ. 

Тодруулбал, арванхоёрдугаар сард хөл хориог сулруулснаас хойших халдварын нөхцөл байдалд үндэслээд ирэх гуравдугаар сард эмнэлгийн орны ачаалал нэмэгдэж магадгүй хэмээн дүгнэсэн байна. Тиймээс болзошгүй эрсдлээс урьдчилан сэргийлэх үүднээс баярын өдрүүдэд хөл хорио тогтоохоор УОК-т санал хүргүүлсэн байна. Судалгааны дүнг маргааш дэлгэрэнгүй танилцуулна гэв.

А.Амбасэлмаа: 

-Анх гарсан 13 том голомтыг бид хатуу хөл хориотой, бүх нийтийн бэлэн байдал зарлаж байж хязгаарлаж чадсан. Халдварын тархалттай тэмцэх, сэргийлэх хариу арга хэмжээ нь урт. Өвчнийг илрүүлж, барьж авах 14 хоног,  хяналтын 14 хоног гэхээр нэг голомтын хувьд сарын ажил байдаг. Гэтэл нэгдүгээр сарын 25-наас хойш цөөн хоногт 20 орчим голомт үүсэж, өвчилсөн хүний тоо өмнөх голомтуудтай харьцуулахад цөөн ч таруу, олон хорооллыг хамарч байна. Тиймээс хөл хорио халдварын тархалтыг барьж авах хамгийн гол арга хэмжээ. Одоо ч өндөржүүлсэн бэлэн байдалд байгаа тул иргэд хөдөлгөөнөө хязгаарлаж, эмнэлгийн байгууллагын зөвлөмжийг хэрэгжүүлэх хэрэгтэй. 

Халдварт өртөж байгаа тохиолдлууд гэр бүл, ажлын газрын хүний ойрын хавьтлууд бөгөөд зай барьж, амны хаалт зүүгээгүй байгаа. Нэг хүн халдвар авахад тухай гэр бүлийн гишүүдээс хүн үлдэхгүйгээр өвчилж байна. Тиймээс халдвараас хамгаалах гол арга хэмжээ бол маск зүүх, зай барих, ариун цэвэр сахих явдал.

Д.Нарангэрэл: 

-Манай улсад дотоодын халдвар гарснаас хойших байдлыг харвал гэр бүл болон хамт олны дунд халдварлуулах индекс өндөр байна. Энэ нь хүмүүсийн амьдралын хэвшил, найрсаг, зочломтгой байдал гэхчлэн гэр бүлийн ахуйтай холбоотой. Хамт олны дунд л гэхэд ширээ сандал ойр, олноороо нэг өрөөнд суудаг, агааржуулалт, гараа угаах байдал муу зэргээс шалтгаалж байгаа. Иймээс халдвар хамгааллын дэглэмээ барьж, зөвлөмжүүдийг дагах хэрэгтэй байна.