Хавдар судлалын үндэсний төв (ХСҮТ)-ийн эмч нар Хөвсгөл аймгийн иргэн Т.Батбаяраас гурван сая төгрөгийн авилга нэхсэн тухай нэвтрүүлгийг LIVETV HD телевиз бэлтгэн хүргэсний дараа АТГ-аас нэр бүхий эмч нарыг шалгаж эхэлжээ.

Хавдраа авхуулах хагалгаанд орох гэж байсан тухайн иргэний ар гэрийнхнээс ХСҮТ-ийн мэс заслын эмч Э.Эрхэмбаяр “20 минутын дотор гурван сая төгрөг авчирч өг. Өгөхгүй бол эмнэлгээс яв” гээд нэхсэн мөнгийг нь өгөөгүй тул төлөвлөгөөт хагалгааг цуцалж, өвчтөнийг эмнэлгээс гаргасан юм.

ХСҮТ-өөр үйлчлүүлсэн иргэн Т.Батбаяр энэ тухай гомдлыг ЭМЯ-нд гаргаж, хэвлэлд хандсанаар олны анхааралд өртөөд буй.

Мэс засалд ороход шаардлагатай зардлын 25 хувийг Эрүүл мэндийн даатгалын сангаас төлж, үлдсэнийг нь эмчлүүлэгчээс гаргуулах журам үйлчилж буй ч дээрх өвчтөний тухайд гурван сая төгрөг бус харин 998,139 төгрөг болох байсан аудитын шалгалтаар тогтоогдсон байдаг тул ХСҮТ-ийн эмч нар илүү мөнгө авахыг завдсан байж болзошгүй гэж үзэж байна.

Тиймээс энэ асуудлыг АТГ-ын Мөрдөн шалгах хэлтэст шалгаж эхэлсэн гэдгийг эх сурвалж баталлаа.

Эх суралжын мэдээлж буйгаар “ХСҮТ-ийн нэр бүхий эмч нарт хэрэг бүртгэлтийн хэрэг нээн шалгаж эхэлсэн. Мөн эмнэлгийн үйл ажиллагаатай холбоотой асуудлыг шалгахаар болсон. Шалгалтын явцад нэр бүхий эмч нарт эрүүгийн хэрэг үүсгэн цаашид яллагдагчаар татан шалгах, эсэхийг шийдвэрлэнэ” гэв.