Манай парламентын хамгийн “эрэлттэй” хүн явчихлаа. Д.Гантулга гишүүний УИХ-ын гишүүнээс чөлөөлөгдөх хүсэлтийг хэлэлцэхэд 76 гишүүний 60 нь хүрэлцэн ирсэн /82,1 хувь/ явдал энэ удаагийн парламентын хувьд ирцийн дээд амжилт болов. Лав л О.Баасанхүү гишүүн чуулганы танхимд “лайв” хийх шаардлага гарсангүй.

Хэрэвзээ, УИХ-ын эрхэм гишүүдийг тухайн хуралдаанаар хэлэлцэж буй асуудал болон ирцийн мэдээллийг харьцуулан уг хүн ямар асуудлаар, сэдвээр, ямар салбараар мэргэшсэн, дагнасан, туршлагажсан хүн бэ гэдгийг тогтоодог бол ихээ эвгүй үр дүн гарах нь. “Бандаашны” асуудал манай парламентын хамгийн чухал бөгөөд тулгамдсан сэдвийн нэгдүгээрт жагсах нь байна шүү дээ. Тэгээд яг үнэндээ чөлөөлөх л байсан юм бол 40 гишүүн ирээд л саналаа дугуйлчихна биз, юун ч олуулаа ирдэг юм. Хүний мууд дуртай хогнууд. Ийм болохоор л “нөхөд ноход болох цаг” гэж ярьдаг байх нь. Нэг танхимд хоёр жил хамт суусан нөхрийн нүүрийг боддоггүй юм гэхэд ядаж л зургаахан хоногийн өмнө “түдгэлзүүлэхгүй ээ” гээд улалзаж суусан өөрсдийнхөө нүүрийг бодоод тал нь ирэхгүй байх хэрэгтэй шүү дээ.

Тэгсэн энэ өдөр бас нэг асуудал боссон. УИХ дахь МАН-ын бүлгээс “УИХ-ын гишүүний насны доод хязгаарыг 30 болгох” тухай хуулийн төсөл санаачилсан гэнэ. (Д.Гантулга УИХ-ын гишүүнээр сонгогдох үедээ 29 настай байв) Үүнийг нь Ж.Батзандан гишүүн эсэргүүцэж “Залуучуудын эрхийг хааж байна. Тэгж яривал залуучуудын төлөөлөл энэ парламентад хамгийн бага, эмэгтэйчүүдээс бага” гэж гомдоллов. Гишүүн Л.Болд “Парламентад 30-аас доош насны төлөөлөлд 20 хувийн квот тогтоох хэрэгтэй” гэсэн ОУПХ-ны зөвлөмжийг иш татав.

Нээрээ, хэрэв Д.Гантулга гишүүний үйлдсэн хэргээс болж парламентын гишүүдийн насны доод хязгаарыг 25 биш, 30 болгоно гэж байгаа бол насны дээд хязгаарыг ч гэсэн тогтоох ёстой. Тавиас дээш насны эрэгтэй хүнийг УИХ-д нэр дэвшүүлж болохгүй гэж. Д.Мурат чинь тавь гарчихаа биз дээ?

Б.ГАЛ