Ховд аймагт коронавирусийн халдварын зөөвөрлөгдсөн хоёр тохиолдол өчигдөр бүртгэгдлээ. Энэ тухай өнгөрөгч шөнө Ховд аймгийн онцгой комиссоос мэдээлэв.

УОК-ийн шийдвэрээр нийслэлд хөл хоригдсон орон нутгийн иргэдийг аймгууд руунэг удаа татан авах ажилагааг эхлүүлсэн бөгөөд Ховд аймгийн Онцгой комисс өчигдөр /2021.01.26/-ны өдөр эхний ээлжийн иргэдээ хүлээн авсан юм. Энэ өдөр таван автобусаар 206 иргэн Ховд аймаг руу зорчсон Дарви сумын хяналтын пост дээр түргэвчилсэн оношлуураар шинжилгээ авахад гурван хүний шинжилгээ эерэг гарсан байна. Тэдгээр иргэдийг тусгаарлаж, PCR-ийн шинжилгээ хийсний дараа хоёр нь эерэг, нэг нь сөрөг гарч Ховд аймагт коронавирусийн халдварын зөөвөрлөгдсөн хоёр тохиолдол бүртгэгдлээ. 

Уг иргэд энэ сарын 23-нд Улаанбаатар хотод шинжилгээ өгч, 25-нд автобусанд суусан шинжилгээ өгсний дараа 23, 24-нд Баянгол дүүргийн "Аянчин" зочид буудал, Хархорин захаар явсан, мөн Сонгинохайрхан дүүргийн 15-р хороонд нийтийн байранд амьдардаг гэртээ очсон байх магадлалтай тухай АОК мэдээллээ.

Энэ дагуу Ховд аймгийн Засаг даргын захирамж гарч, Ховд аймгийн нутаг дэвсгэрээс гарах, орох хөдөлгөөнийг түр хязгаарлаад байна.

Халдвартай болон хавьтагч иргэд /автобусны жолооч, зорчигчид/ нийт 41 хүнийг  Дарви суманд тусгаарлалтад байлгасан бөгөөд өнөөдөр өглөө Дарви сумаас Жаргалант сумын нисэх онгоцны буудал руу тээвэрлэж, онгоцоор зөөвөрлөн Улаанбаатарт авчирч байна. Халдвар авсан иргэдийг ХӨСҮТ-д шилжүүлж, ойрын хавьтал буюу нэг автобусанд хамт зорчсон иргэдийг тусгаарлах байруудад ажиглалтад байлгах юм байна. 

Хот хооронд зорчиж буй иргэдээс халдвар илэрсэнтэй холбогдуулан Улсын Онцгой комиссын шийдвэрээр хот хоорондын зорчих хөдөлгөөнийг хааж, аймгуудын иргэдээ татан авах ажлыг бүрэн зогсоолоо.

Мөн Улаанбаатар хотоос ирж  гэрийн ажиглалтад байгаа иргэдэд тасралтгүй хяналт  тавих, болзошгүй эрсдэлээс урьдчилан сэргийлэх бүх талын арга хэмжээг авч ажиллахыг сумдын Засаг дарга, Онцгой комиссын дарга нарт үүрэг болгосон байна.