УОК-оос гаргасан шийдвэрийн дагуу Улаанбаатар хотод хөл хоригдоод байгаа орон нутгийн иргэдийг харьяа аймгууд руу нэг удаагийн татан авалт хийхээр шийдвэрлэсний дагуу орон нутаг руу зорчих хөдөлгөөнийг нээгээд байгаа билээ.   

Өчигдөр буюу 2021.01.26-нд Ховд аймаг руу зорчсон 206 иргэнээс түргэвчилсэн оношлуураар шинжилгээ авахад хоёр иргэний хариу эерэг гарсан тухай өчигдөр мэдээлэгдсэн билээ. Уг хоёр иргэнээс авсан PCR шинжилгээний хариу эерэг гарч, коронавирусийн халдвар авсан нь батлагдсан тухай Аймгийн онцгой комиссоос дөнгөж сая мэдээллээ.

АОК хуралдаж, ЭМЯ-тай зөвшилцсөний эцэст халдвар авсан хоёр иргэнийг ойрын хавьтал буюу автобусанд хамт зорчсон 38 иргэний хамт өнөөдөр /өглөөний 08.00 цагт/ нийслэл рүү онгоцоор зөөвөрлөхөөр шийдвэрлэсэн байна. Мөн "Халдвар авсан иргэд болон хамт зорчсон ойрын хавьтлын хүмүүсийг аймаг руу нэвтрүүлээгүй, аймгаас гадна тусгаарласан учраас Ховд аймаг ногоон бүс хэвээрээ байгаа" хэмээн мэдэгдлээ.

Халдвар батлагдсан хоёр иргэний хувьд орон нутаг руу зорчиж байгаа бусад иргэдийн адил PCR  шинжилгээ өгч бүртгүүлсэн авч, тэдний явсан маршрутыг шалгахад шинжилгээ өгсний дараа буюу 23, 24-ний өдөр Аянчин зочид буудал, Хархорин захаар явсан. Сонгинохайрхан дүүргийн 15-р хороонд нийтийн байранд оршин суудаг тул ямар нөхцөлд халдвар авсныг тодорхойлох боломжгүй байна гэв.   

Халдвар авсан хоёр иргэний биеийн байдал хэвийн байгаа боловч хамт зорчсон 74 настай эмэгтэйн бие тааруу, суурь өвчлөлтэй, эмчилгээ авах шаардлагатай байгаа аж.Тэднийг Улаанбаатарт ирсний дараа халдвартай хоёр иргэнийг ХӨСҮТ-д шилжүүлж, хамт зорчсон ойрын хавьтлын 38 хүнийг тусгаарлах байруудад шилжүүлэн ажиглалтад байлгах юм байна.