Өнөөдөр Сүхбаатар дүүргийн гуравдугаар хороонд 24 настай эрэгтэйн PCR шинжилгээний хариу эерэг гарч, шинэ голомт үүссэн. Тус тохиолдолтой холбоотойгоор Улаанбаатар хотын товчуудуудаар орох, гарах хөдөлгөөнийг хаасан талаар мэдээлэл цацагдаад буй.
Тэгвэл энэ талаар Тээврийн цагдаагийн алба "Нийслэлээс гарах хөдөлгөөнийг бүрэн хаагаагүй, тодорхой хэмжээнд хязгаарлалттайгаар зорчуулж байгаа. Тодруулбал, хүнс, шатахуун, өвс зэрэг тодорхой чиг үүргийн машинуудыг гаргаж байна. Харин хувийн жижиг автомашинтай иргэдийг гаргахгүй байгаа" гэлээ.
Харин Улсын Онцгой комисс "Нийслэл бол голомтот бүс нутаг. Иймд гарах хөдөлгөөнд хязгаарлалт тогтоосон хэвээр байгаа. Орон нутгаас ирээд нийслэлд гацсан иргэдийг судалгааг аймгуудаас авсан. Тухайн судалгаанд суурилан аймгуудын болон нийслэлийн Онцгой комисс хамтран иргэдийг хот хооронд зорчуулах ажлыг халдвар хамгааллын дэглэмийг сахиулан зохион байгуулж байгаа. Аймгуудаас ирүүлсэн судалгаанд нэр нь байхгүй иргэдийг хотоос гаргахгүй. Учир нь дээрх судалгаанд үндэслэн иргэдийг тухайн орон нутагт нь тусгаарлах ёстой тул нэрс багтаагүй бол гаргах боломжгүй" гэлээ.
Орон нутгаас нийслэлд ирж буй иргэд асуумж бөглөж нэвтрэх боломжтой хэвээр байгаа аж.
