Эрүүл мэндийн яамнаас ээлжит мэдээллээ хийлээ.
Энэ үеэр ХӨСҮТ-ийн ерөнхий захирал Д.Нямхүү “Өргөө” амаржих газарт болсон үйл явдалтай холбогдуулан иргэдээс уучлалт хүслээ.
Тэрээр "Нэгдүгээр төрөхөд амаржсан эхийг тээвэрлэхэд манай эмнэлэг алдаа гаргаснаа хүлээн зөвшөөрч өчигдөр эхээс уучлалт хүссэн. Өнөөдөр олон нийтэд хандан мөн амаржсан эх болон гэр бүлийнхнээс нь уучлалт хүсэж байна" гэлээ.
ХӨСҮТ-ийн Тандалт, судалгааны албаны дарга А.Амбасэлмаа "Өчигдөр улсын хэмжээнд 13313 хүнээс PCR шинжилгээ авахад 32 хүнээс коронавирус илэрлээ. Бүгд Улаанбаатарт бүртгэгдсэн.
Үүнд, Баянгол дүүргийн 12-р хорооны 19-р байрны нэг орцны зургаан айлын 13 хүнээс коронавирус илэрлээ. Энэ орцонд ЭХЭМҮТ-ийн нэг эмч амьдарч байсан. тус эмнэлгээс 900 гаруй хүнийг шинжилгээнд хамруулахад урьдчилсан байдлаар 600 хүний шинжилгээнээс вирус илрээгүй.
Нэгдүгээр амаржих газар төрсөн эхийн гэр бүлийн зургаан хүнээс коронавирус илэрсэн.
Тус төрөх эмнэлгээс 357 хүнд PCR шинжилгээ хийхэд коронавирус илрээгүй. Энэ ээж 1-р сарын 14-нд Нэгдүгээр төрөхөд хэвтсэн, тухайн үед ээж халдвар авснаа мэдээгүй байсан. Одоо ч ээжид халдварын шинж тэмдэг илрээгүй байна. Эмнэлэгт хэвтсэний дараа орцонд нь халдвар гарсныг мэдэж, төрөх эмнэлэг рүү өчигдөр мэдэгдсэн" гэлээ.
