Маргааш буюу нэгдүгээр сарын 8-ны өдрөөс эхлэн нийслэлийн хэмжээнд тэг зогсолт хийх гэж байна гэх мэдээллүүд цахим сүлжээгээр тархаад буй.

Тэгвэл энэ мэдээлэл нь үндэслэлгүй бөгөөд өнөөдөр Улсын онцгой комисс, Засгийн газар хуралдаагүй, тэг зогсолт хийх талаар яриа болоогүй гэдгийг Засгийн газрын Хэвлэл мэдээлэлтэй харилцах хэлтсээс мэдээллээ. 

Өнөөдрийн Эрүүл мэндийн яамны мэдээллийн үеэр “Тэг зогсолт хийх саналыг ЭМЯ дангаараа гаргадаггүй. Халдварыг эсэргүүцэх чиглэлээр ажиллаж буй төрийн 17 байгууллагын судалгаа, саналд үндэслэн, тэдний саналыг нэгтгэж Засгийн газарт саналаа уламжилдаг. ЭМЯ-наас одоогоор тэг зогсолт хийх санал Засгийн газарт гаргаагүй байна” гэсэн билээ.

Нийслэлд тогтоосон хөл хориог нэгдүгээр сарын 11-ний өдрийг хүртэл сунгасан байгаа. Энэ хугацаанд нэн шаардлагатай буюу 15 салбарын ажилтнууд ажиллах бөгөөд үйлчилгээ, худалдааны салбаруудад хязгаарлалт тогтоогоод байгаа юм.

Засгийн газраас нэгдүгээр сарын 11-ны 06:00 цагаас зэрэглэлээ бууруулж, худалдаа, үйлдвэрлэл, үйлчилгээний салбаруудыг нээхээр төлөвлөж байгаа талаараа мэдээлж байсан.

Тодруулвал, хоолны газрууд, бүх төрлийн хүргэлтийн үйлчилгээ, ахуйн барааны жижиг дэлгүүрүүд ажиллаж эхлэх юм. Харин хүн амын төвлөрөл, зорчих хөдөлгөөн их, эрсдэл өндөртэй учраас уушийн газар, саун, кино театр, барааны зах зэрэг нэр бүхий 18 салбар ажиллах боломжгүй. 

Тэг зогсолт хийхгүйгээр хөл хориог нэгдүгээр сарын 11-ний өдрөөс хойш дахин 14 хоног сунгах талаар мэдээлэл гараад байгаа боловч мөн л энэ мэдээлэл нь албан ёсных биш юм. 

Өмнө нь Шадар сайд Я.Содбаатар 1.7 сая хүн оршин суудаг нийслэлд тэг зогсолт хийх боломжгүй гэдгийг хэлж байв.