Засгийн газрын ээлжит бус хуралдаан болж хөл хориог таван хоногоор сунгахаар боллоо. Ингээд хатуу хөл хорио 2021 оны нэгдүгээр сарын 11-ний 06:00 цаг хүртэл үргэлжлэх юм. 

Шадар сайд Я.Содбаатар "Бүх нийтийн бэлэн байдлын зэргийг 2021 оны нэгдүгээр сарын 11-нээс зэрэглэл бууруулж худалдаа, үйлдвэр үйлчилгээний салбарын үйл ажиллагааг хэвийн горимд шилжүүлэх чиглэлээр тодорхой шийдвэр гаргалаа. Дэлхий нийтийг сандаргаж байгаа энэ цар тахлын нөхцөл байдал УОК, ЗГ-ыг Бүх нийтийн бэлэн байдлыг зэргийг сунгахаас өөр аргагүй байдалд оруулж байна. Нөгөө талдаа биднийг эдийн засаг, иргэдийн амь амьжиргаа хатуу хөл хориог сунгахад хүндрэл дагуулж байна. Иймээс бид аль аль нөхцөл байдлыг үндэслэж, олон талаас судлаж шийдвэрийг гаргалаа. 

Бид иргэдээс санал авсан. 70 хувь нь сулруулах, 30 хувь хатуу хөл хориог үргэлжлүүлэх, эрдэмтдийн зөвлөл 14 хоног сунгах санал өгсөн. Энэ олон саналыг үнэлж, хэлэлцээд хатуу хөл хорио 2021 оны нэгдүгээр сарын 11-нийг сунгах шийдвэр гаргалаа. Үүнээс хойш зэрэглэлээ бууруулахаар тогтлоо. 

Гэхдээ энэ хугацаанд халдварын шинэ голомт дахин үүсэж, цар тахал улам дэлгэрэх нөхцөл үүсвэл илүү хатуу арга хэмжээ авахаас өөр аргагүй байдалд орно. Ер нь хөл хорионы асуудал бидний санал санаачлага, тооцоо судалгаагаар явахгүй байна. Хөл хориог сулруулсны дараа голомт үүсэх, эрүүл мэндийн салбар хүнд байдалд орох нөхцөл байдал үүсэхийг үгүйсгэх аргагүй. 

Бүх улс орон ковид-19-ийн тархалтыг хамгийн үр дүнтэй тогтоож, хязгаарлаж байгаа арга хэмжээ нь хатуу хөл хорионы зарчим. Азийн орнууд ихэнх нь хатуу хөл хориог 14-30 хоногоор тавьж байна. Шинэ жил, цагаан сарын баяртай холбогдуулан гэж хэлж болно. Энэ бол эргэж буцсан шийдвэр биш. Орон нутагт хэвийн амьдралруугаа шилжих ажил шат дараатай явж байна. Бид Улаанбаатрыг голомтыг хумихаар ажиллаж байна. Дэлхийн аль оронд халдварын голомтыг бүрэн зогсоож, вирусгүй болсон улс алга" гэлээ.