ХӨСҮТ-ийн Тандалт, судалгааны албаны дарга А.Амбасэлмаа өчигдөр улсын хэмжээнд хийгдсэн коронавирусийн шинжилгээний хариуг  танилцууллаа.

Шинжилгээгээр 38 хүний сорьцод коронавирус илэрсний 36 хүнБайнзүрх дүүргийн эмнэлгийн голомтоос илэрсэн байна. Үлдсэн хоёр тохиолдлын нэг нь цэргийн төв эмнэлгийн сувилагч, нэг нь зөөвөрлөгдсөн тохиолдол байна. 

БЗД-ийн нэгдсэн эмнэлэгийн голомтод хавьтал болсон 682 хүнд гурав дахь давтан шинжилгээ хийхэд 15 хүнээс коронавирус илэрсэн байна. Гэр бүлийн хамааралтай 100 гаруй хүнд шинжилгээ хийхэд 17 хүнээс коронавирус илэрчээ. Ингэснээр БЗД-ийн голомтод гарсан халдварын тоо 226 болжээ. Үүнд эрүүл мэндийн ажилтан 22, гэр бүлийн гишүүн 76, өвчтөн 91, сахиур 29, бусад хавьтлаас 8 хүн байна. 

Мөн ХӨСҮТ-ийн хавьтал болсон 126 хүнд давтан шинжилгээ хийхэд дөрвөн хүнээс коронавирус илэрчээ. Батлагдсан хоёр тохиолдлын гэр бүлийн хавьтал гурван хүн, тухайн тасагт хамт ажилладаг нэг сувилагч байна. Улаанбаатар хотод сүүлийн 24 цагийн дотор батлагдсан тохиолдол 376 болж өслөө. 

Улсын хэмжээнд халдварын батлагдсан тохиолдол 1,175 болсон бол үүнээс 745 хүн эдгэрсэн байна. Эмчлэгдэж байгаа 420 хүний биеийн байдлыг үнэлбэл, маш хүнд 2, хүнд 7, хүндэвтэр 77, хөнгөн 334 байна гэв.

Сүүлийн 24 цагийн дотор Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй. Мөн Улаанбаатар хотын өмнөх голомтуудаас батлагдсан тохиолдол бүртгэгдээгүй байна.  

Дотоодын халдвар /2020.12.29/

-Улаанбаатар хотод 376

-Орхонд 25

-Архангайд 3

-Сэлэнгэд 217

-Дархан-Уулд 45

-Говьсүмбэрт 4

-Дорноговьд 32 тохиолдол тус тус бүртгэгдсэн байна.