Өнөөдөр УИХ-ын чуулганаар эрчим хүчний салбарын асуудлаар цаг үеийн мэдээллийг гишүүд сонсов. Энэ үеэр УИХ-ын гишүүн Ж.Мөнхбат “Ерөнхий сайд маань удвал жиндэхээр өрөөнд сууж байна лээ. Эрчим хүчээ хэмнэхийн тулд эх оронч сэтгэлээр нэмэлт халаагуураа салгасан байна. Энэ мэтчилэн бүгдээрээ хэмнэлт хийх хэрэгтэй” гэсэн нь олон хүний дургүйг хүргэв.

Үндсэндээ Засгийн газар, Ерөнхий сайд маань биднийг "дулаахан өвөлжөөсэй” гэсэндээ биш, зутруухан суулгах л гэж цахилгаан, дулааны төлбөрөөс чөлөөлсөн болж таарлаа. Ж.Мөнхбат гишүүний чуулганы индэр дээрээс “аядуу зөөлнөөр” хэлсэн энэ үг цаашлаад цахилгаан, дулаан түгээхийнхний ажлын норматив, албан ёсны хэмжүүр болох вий гэж айж болгоомжлох сэтгэл ч төрж байна.

Жаахан азнаад "Цайгаа битгий буцалгаагаарай, хоолоо дутуухан болгоорой" ч гэх юм уу, дүрэм журмууд бас гарах нь л дээ. Хөл хорионд гэртээ суугаа иргэдийг дүн өвлийн хүйтнээр “цахилгаанаа хэмнэ” гэж зандрахын оронд "Ерөнхий сайд аа, нусаа тат! Халаагуураа нээ" гээд хэлчих хэрэгтэй л дээ.

Ц.ТУЯА