Хэвлэлийн хүрээлэнгээс "Мэдээллээ мэдэж ашиглая" хуурамч мэдээллийг ялган, таних аргазүйн сургалтыг цахимаар зохион байгууллаа.

Хэвлэлийн Хүрээлэн Ардчиллын төлөөх Үндэсний сангийн дэмжлэгтэйгээр Бүгд Найрамдахчуудын Олон Улсын Хүрээлэнтэй хамтран DREAM төслийн хүрээнд хэд хэдэн ажлууд зохион байгуулж байна. Тэдгээрийн нэг өнгөрсөн зун зохион байгуулагдсан УИХ-ын сонгуулийн сурталчилгааны үеэр иргэдэд хүрсэн мэдээллийн гуйвуулгын цар хүрээ, шинж чанар, эрсдэлийн түвшинд үнэлж дүгнэсэн судалгааны үр дүнг олон нийтэд танилцуулсанг бид мэдээлж байсан.

Харин энэхүү мониторингийн судалгааг хэрхэн хийсэн, түүний арга зүй, аргачлалыг танилцуулах, энэхүү аргачлалаар ажиллах дадал хэвшил олгох практик туршлага эзэмшүүлэх зорилго бүхий сэтгүүлчдэд болон иргэний нийгмийн байгууллагуудын төлөөлөлд зориулсан сургалт 12 дугаар сарын 10-14-ний хооронд зохион байгуулагдлаа.

Сургалтын хөтөлбөрт мэдээллийн төрөл, ангилал, цаашлаад худал мэдээллийг нягтлан шалгах арга техник /гэрэл зураг, гүүгл мэп болон видео мэдээллийг шалгах апп/, сошиал медиа ялангуяа фэйсбүүк, твиттер зэрэг флатформоос бид ямар төрлийн мэдээлэл хүлээн авч байна вэ, нийгмийн мэдээллийн сүлжээнд мониторинг хийх арга зүй гэх мэтчилэн хуурамч мэдээллийг таних анхдагч суурь боловсролыг сургалтын хэлбэрээр оруулж өгсөнөөрөө онцлог байлаа.

Энэхүү сургалтад хэвлэл мэдээллийн байгуллагуудаас Bloomberg, TV5, Боловсрол, VTV, Star TV телевиз, Өнөөдөр сонин, Forbes Mongolia зэрэг сонин, сэтгүүл мөн gogo.mn, Analyst.mn, azur.mn, inews.mn зэрэг сайтын сэтгүүлчид болон зарим төрийн байгууллагуудын хэвлэл мэдээлэл хариуцсан мэргэжилтнүүд багтан нийт 25 сэтгүүлчид хамрагджээ. Мөн аймаг орон нутгаас иргэний нийгмийн байгууллагуудын төлөөлөл бүх насны иргэд хамрагдаж сэтгүүлзүйн ойлголтоос эхлээд хувь хүний түвшинд, үйл ажиллагааны чиглэлийн хүрээнд хэрхэн хуурамч мэдээлэлтэй тэмцэх, түүнийг ялган танихын ач холбогдлын талаар суралцав.