Цар тахлын шинэ голомтыг хумих зорилгоор Нийслэлийн хэмжээнд Арванхоёрдугаар сарын 23-ны өдрийн 06:00 цагаас 2021 оны нэгдүгээр сарын 6-ны 06:00 цаг хүртэл бүх нийтийн хэсэгчилсэн хөл хориог тогтоож байна.

Энэ талаар Шадар сайд Я.Содбаатар "Цаг үеийн нөхцөл байдлыг үнэлж, Улсын Онцгой комисс хуралдсан бөгөөд Засгийн газар мөн хуралдаж дараах шийдвэрүүдийг гаргалаа.

Мэргэжлийн хүмүүсийн зөвлөмжийг дагаж, Засгийн газар Улаанбаатарын хэмжээнд бүх нийтийн бэлэн байдлын зэргийг хэсэгчилсэн байдлаар тогтоох шийдвэр гаргалаа. Нийслэлийн хэмжээнд Арванхоёрдугаар сарын 23-ны өдрийн 06:00 цагаас 2021 оны нэгдүгээр сарын 6-ны 06:00 цаг хүртэл бүх нийтийн хэсэгчилсэн хөл хориог тогтоож байна.

Хөдөө явсан иргэд байгаа тул энэ хугацааг олгож байна.

Засгийн газраас иргэдийн амь нас эрүүл мэндийг хамгаалах асуудлыг нэн тэргүүнд тавьж байгаа. Эрүүл мэндийн ачааллыг өнөөдрийн нөхцөл байдлаас давуулахгүй байхад анхаарч байна. Өдөрт 20-30 хүнээр нэмэгдэж байна. Иргэдийн дунд байсан хүмүүсээс халдвар тархах эрсдэл өндөр гэсэн судалгааг мэргэжлийнхэн өгч байгаа. Дэлхийд 192 орон хөл хорио тогтоогоод байна. Жишээлбэл, Англид шинэ вирус илэрсэн. Халдварын тархалт нэмэгдэх хандлагатай гэж үзэн олон орон хөл хорио тавьж байна.

Шинэ жилийн үеэр олон хүн цугладаг. Үүнийг дагаад халдварын тархалт нэмэгдэх хандлагатай гэж олон орон уг арга хэмжээг хориглож байна. Дэлхий нийтээр вакцинжуулалтад ихээр анхаарал хандуулж байгаа.

Монгол Улсын Ерөнхий сайд ДЭМБ-ын суурин төлөөлөгчийг хүлээн авч, вакцинжуулалтын ажлын явцын талаар ярилцаж байна. 2021 оны нэгдүгээр улиралд нийтийг вакцинжуулах ажлыг зохион байгуулахаар төлөвлөн ажиллаж байна. Гэртээ байх нь хайртай хүмүүсийнхээ эрүүл мэндийг хамгаалах хамгийн зөв арга юм" гэлээ. 

Мөн тэрээр үргэлжлүүлэн "Өмнө нь хатуу хөл хорио тогтоох үед олон иргэд хөдөөнөөс гэртээ ирэх гээд гацчихсан. Халдваргүй бүсээс ирж байгаа бол Улаанбаатар руу орох хөдөлгөөн арванхоёрдугаар сарын 23-ны 06:00 цаг хүртэл нээлттэй. Гарах хөдөлгөөн хаалттай байгаа. Хөдөө явсан иргэд байгаа тул энэ хугацааг олгож байна.

Өнөөдөр өглөөний 06:00 цагаас эхлэн гарах хөдөлгөөн дээр хатуу хяналт тавьж байна. Улаанбаатар хотод халдвар голомтлон гарч байгаа учир хүнсний зориулалт, буяны ажил гээд тодорхой хүндэтгэх шалтгаантай хүмүүсийг Улаанбаатараас гаргах чиглэл өгсөн. Энэ хугацаанд иргэд хүнс нөөцлөх янз бүрийн асуудал байдаг.

Нийтээрээ энд тэнд дараалалд зогсоод дэглэм алдчихгүй байх гэж найдаж байна. Ганцхан манай улс хатуу хөл хорио тавиагүй. Бүх улс оронд хөл хорио тавьж байгааг харж байна" гэлээ.