Өнгөрсөн ням гаригт Ерөнхий сайд У.Хүрэлсүх олон нийтэд хандан мэдээлэл хийсэн билээ.
Мэдээллийн үеэр Ерөнхий сайдад Эрүүгийн хуульд өөрчлөлт оруулж, худал мэдээлэл түгээсэн хэргээр сэтгүүлчид 1-5 жил хорих ял, хэвлэл мэдээллийн байгууллагад 10-80 сая төгрөгийн торгууль оногдуулдаг болох гэж байгаад сэтгүүлчид шүүмжлэлтэй хандаж байгаагаа илэрхийлсэн юм.
Харин Ерөнхий сайд У.Хүрэлсүх "Сэтгүүлчдийг торгох шийтгэхээс илүүтэй, олон улсын жишигт нийцсэн арга хэмжээ авмаар байна. Сэтгүүлчдийн ёс зүйн хороо гэж байгаа. Тэр хороогоор нь хэн нэгнийг доромжилсон бол асуудлаа ярьдаг байх нь зөв гэж Ерөнхий сайдын хувьд боддог.
Аль болохоор хүний эрх, хэвлэн нийтлэх эрх чөлөөг хамгаалж ажиллана. Хэвлэл мэдээллийн салбар гэдэг бол манай дөрөв дэх засаглал учир хүндэтгэлтэй хандах хэрэгтэй. Сэтгүүлчид маань мэдээж хариуцлагатай байх хэрэгтэй" гэсэн юм.
