Засгийн газрын өнөөдрийн хуралдаанаар зарим аж ахуйн нэгж, айл өрхийн цахилгаан, дулаан, ус, хогны төлбөрийг энэ оны арванхоёрдугаар сарын 1-нээс 2021 оны долоодугаар сарын 1-н хүртлэх хугацаанд тэглэх шийдвэр гаргалаа. Үүнд шаардлагатай 650 тэрбум төгрөгийг "Эрдэнэс үйлдвэр"-ээс гаргахаар болжээ.

Энэ талаар Эрдэнэт үйлдвэр ТӨҮГ-ны захирал Х.Бадамсүрэн мэдээлэл өглөө.

Тэрээр "Эрдэнэт үйлдвэр 2019 онд төрийн өмчийн үйлдвэрийн газар болсон. Үүнээс хойш өртөг зардлаа хямдруулах ажлыг бүх түвшинд хийж байгаа. ТӨҮГ болоод орлогоо нэмэгдүүлэх ажлыг үе шаттай хийсэн. 

Эрдэнэт үйлвэр үйл ажиллагаагаа 5, 5 жилээр боловсруулж 2031 он хүртэл хөгжүүлэх бичиг баримтыг батлуулсан. Энэ чиглэлийн дагуу бид ажиллаж байна. 650 тэрбум төгрөг гэдэг их мөнгө. Зардлаа танах ямар боломж байгааг судална.

Нөгөө талаар 2021 оны төсөв төлөвлөгөөг Төрийн өмчийн бодлого зохицуулалтын газраар хэлэлцүүлнэ. Тодорхой хугацаанд хөрөнгө оруулалтаа царцаах асуудал гарна гэж бодож байна. Цар тахлын энэ үед Эрдэнэт үйлдвэр нэлээд бэлтгэлтэй байсан. 

Олон улсын арбитрын шүүхээр хэлэлцсэн Казахстаны компаниас авах 20 сая ам.долларыг 2019 онд авч чадсан. Мөн 60 гаруй тэрбум төгрөгийн хэмнэлт хийсэн. 2019 ондонн нийтдээ 150 гаруй тэрбум төгрөгийн хэмнэлт, авлага авсан. Түүнчлэн Эрдэнэт үйлдвэр гадаад дотоодын аль нэг байгууллагад өр төлбөргүй болсон.

Өнөөдрийн шийдвэрийг эзэн нь юмаа мэдэж, эрэг нь усаа хашдаг зарчмаар шийдвэр гаргалаа. 100 төрийн өмчит Эрдэнэт үйлдвэр энэ хэцүү цаг үед үүргээ хэрэгжүүлэх нь зүйн хэрэг. Бид илүү хичээн ажиллах болно. Сангийн яамнаас гаргаж өгөх хуваарь графикийн дагуу төлбөрийг хийнэ" гэлээ.  

Харин Сангийн сайд Ч.Хүрэлбаатар "Эрдэнэт үйлдвэр ТӨҮГ нь 2019 онд 933 тэрбум төгрөгийн татвар төлсөн. 2020 онд нэг их наядыг давсан татвар улсад төлж байна" гэлээ.