Ойд хууль бусаар мод хөрөөдсөн гэх иргэдийг модоор зодож буй бичлэгээ “Босоо хөх Монгол” ТББ-ын удирдах зөвлөлийн гишүүн П.Шинжээравдан цахим хуудсандаа 2020-01-24-ны өдөр байршуулсан байдаг.

Харин тухайн бичлэг дээрх иргэн 52 настай эрэгтэй Г уг бичлгээс гурав хоногийн дараа буюу 2020-01-27-ны өдөр эзэнгүй балгасны дай модноос өөрийгөө боомилсон байдалтай олдсон юм.

Уг хэрэгт “Босоо хөх Монгол” ТББ- ын удирдах зөвлөлийн гишүүн П.Шинжээравдан, А.Дарьсүрэн нарыг Хүнийг амиа хорлох нөхцөл байдалд хүргэх болон заналхийлэх гэсэн зүйл ангиар Сэлэнгэ аймгийн цагдаагийн газрын Мандал сум дахь сум дундын цагдаагийн хэлтэс шалгасан юм.

Энэ хэргийн мөрдөн байцаалт дуусч хэргийн урьдчилсан хэлэлцүүлэг 2020-10-27-ны өдөр Сэлэнгэ аймгийн Мандал сум дахь сум дундын эрүүгийн шүүхэд болжээ. Гэм буруугийн шүүх хурал 2020-11-10-ны өдөр болсон юм. Улмаар уг хэрэгт П.Шинжээравдан, А.Дарьсүрэн нарыг гэм буруутайд тооцож, П.Шинжээравданг 600 мянган төгрөгөөр торгох ялаар, А.Дарьсүрэн тэнсэн харгалзах хугацаанд гэмт хэрэгт холбогдсон тул нэг сая төгрөгөөр торгох болон хоёр жилийн ял оноожээ.

Хэргийг тодруулбал, талийгаач иргэний бичлэгийг “Босоо хөх Монгол” ТББ-ын тэргүүн П.Шинжээравдангийн фэйсбүүк хуудастаа оруулсан бөгөөд "Нойтон мод бэлтгэж байсан хүмүүст жавтий хүртээв" гэсэн тайлбартай оруулсан байдаг.