Хөл хорионы үед архи, согтууруулах унпдаа худалдаалахыг хориглосны улмаас иргэдийн дунд хүнсний бус спирт хэрэглэх, эрүүл мэндээрээ хохирох явдал гарсаар байна. Хамгийн сүүлд буюу өчигдөр Төв аймгийн Заамар сумын нутаг дэвсгэрт үйл ажиллагаа явуулдаг бичил уурхайд ажилладаг долоон хүн техникийн спирт хэрэглэж, дөрөв нь нас барсан талаар УОК-ын Шуурхай штабын дарга Б.Ууганбаяр мэдээллээ.
Тэрбээр "Өчигдөр орой Төв аймгийн Заамар сумын нутаг дэвсгэрт үйл ажиллагаа явуулдаг бичил уурхайд золгүй тохиолдол гарсан байна. "Архи уусан" гэх долоон хүний нэг нь газар дээрээ, гурван хүн сумын Хайлааст багийн эмнэлэгт хүргэгдээд нас барсан. Гурван хүн нь одоо Улсын нэгдүгээр төв эмнэлэгт эрүүл мэндийн тусламж үйлчилгээ авч байгаа. Нэг хүнийх нь биеийн байдал тааруу байна" гэв.
Эдгээр хүмүүс "архи уусан" гэж мэдүүлж байгаа ч техникийн спирт хэрэглэсэн нь шинжилгээгээр тогтоогдсон байна.
Техникийн спирт нь хүний биед маш хортой, архи болон этилийн спиртээс өнгө, үнэрийн хувьд ялгарахгүй ч 100 грамм техникийн спирт уухад л хүнийг үхэлд хүргэх аюултай аж.
