ЭМЯ-ны ээлжит хэвлэлийн мэдээллийн цагаар ХӨСҮТ-ийн Тандалт, судалгааны албаны дарга А.Амбасэлмаа өчигдөр хийгдсэн коронавирус илрүүлэх шинжилгээний хариуг танилцууллаа.
Өчигдөр буюу арванхоёрдугаар сарын 5-нд ХӨСҮТ-ийн хоёр, ЗӨСҮТ-ийн болон Дархан-Уул, Сэлэнгэ, Орхон, аймгийн салбар лабораторид нийт 14,019 хүнд шинжилгээ хийснээс 700 гаруй нь хавьтлын хяналтын шинжилгээ байжээ. Үүнээс долоон сорьцод коронавирусийн халдвар илэрсэн бөгөөд тандалтын бусад сорьцод халдвар илрээгүй байна.
Дээрх долоон тохиолдлын дөрөв нь Сэлэнгэ аймагт батлагдсан тохиолдлын ойрын хавьтал байна.
Дорноговь аймгийн Замын-Үүд суманд гурван тохиолдол бүртгэгдсэн нь мөн гэр бүлийн хавьтлууд байжээ.
Улаанбаатар хот болон Дархан-Уул, Говьсүмбэр, Орхон, Архангай аймагт сүүлийн 24 цагт өвчлөл бүртгэгдээгүй гэв.
Дотоодод голомтлон гарсан халдвараас 13 хүн эдгэрчээ
А.Амбасэлмаа:
-Өчигдөр эдгэрсэн 16 хүн ХӨСҮТ-өөс гарч, дараагийн шатны буй сувилалын ажиглалтад шилжлээ. Эмнэлгээс гарсан хүмүүсийн дотор голомтлон гарсан халдвараас үүдэлтэйгээр өвчилсөн 13 хүн байгаа. Тодруулбал, Улаанбаатарын 7, Сэлэнгийн 1, Орхоны 4, Дорноговь аймгийн нэг хүн голомтлосон халдвараас эдгэрч ажиглалтад шилжлээ. Мөн ТИР машины жолооч нэг хүн, Энхсаран сувилалд халдвар авсан хоёр хүн, ингээд нийт 16 хүн эдгэрлээ.
Өнөөдрийн байдлаар улсын хэмжээнд батлагдсан тохиолдлын тоо 849 болсон бөгөөд өнөөдрийн байдлаар 456 хүн эмчилгээнд байна. Биеийн байдлыг үнэлбэл, маш хүнд 2, хүнд 4, хүндэвтэр 68, хөнгөн 382 тохиолдол эмчлэгдэж байна" гэлээ.
Дотоодод голомтлон гарч буй халдварын тохиолдол 404 /2020.12.06-ны байдлаар/
- Сэлэнгэд - 201
- Улаанбаатарт - 99
- Дархан-Уулд - 45
- Орхонд - 24
- Дорноговьд - 28
- Говьсүмбэрт - 4
- Архангайд - 3 батлагдсан тохиолдол байна.
