Засгийн газрын өнөөдрийн ээлжит хуралдаанаар гаргасан шийдвэрийг Шадар сайд Я.Содбаатар танилцууллаа.
Тэрээр "Дэлхийн хэмжээнд бэлэн болсон вакцин нэг ч алга байна. Харин хөгжүүлэлт амжилттай явагдаж гурав дугаар шатлалаа давсан 10н вакцин байна. Монгол улс хамгийн эхний ээлжилд вакцинд хамрагдах орны тоонд орохын тулд идэвхтэй ажиллаж байна. Гэхдээ Монгол улсын вакцинжуулалтын тухай хуульд тухайн иргэн вакцинд хамрагдах нь сайн дурын үндсэн дээр явагдана гэх заасан байгаа. Дэлхийн зарим оронд зайшгүй хийдэг бол манай улсад сайн дурын үндсэн дээр явагддаг. Бид зургаан чиглэлд вакцин авахаар ажиллаж байна. ДЭМБ, хоёр хөршдөө хандах зэргээр. Мөн дэлхий нийтэд зарлагдаад байгаа вакцинууд 18 нас хүртэлх хүүхдэд хийгдэхгүй. Эхний ээлжинд нэг сая гаруй тун вакцины асуудал шийдэгдэнэ. Олон улсын түвшин ядуу буурай, баян хамаагүй бүх оронд 20 хувь хангах асуудал дэвшүүлж байх шиг байна. Бид вакцин авах орны жагсаалтад дээгүүр орох ажлыг хийж байгаа. Засгийн газрын хуралдаан бүр дээр яригдаж байгаа.
Мөн гадаад нислэгээр ирсэн иргэдийн тусгаарлалтын хугацаа гүйцэж, тусгаарлах байрны хүрэлцээ боломжийн болж байгаа учир шаардлага хангасан байрууддаа тааруулж, олон улсын нислэг явуулахаар боллоо. Нислэгийн мэдээллийг тухайн үед нь мэдээлнэ.
Мөн 12 дугаар сарын 11-нийг хүртэл хийх тандалтаар халдвар авсан хүмүүсийн хавьтлын бус иргэдээс коронавирус илрэхгүй бол үйлчилгээний байгууллагуудын үйл ажиллагааг үе шаттайгаар нээх асуудлыг хэлэлцсэн.
Мөн энэ хуралдаанаар Ковид-19 цар тахлын халдварын хүрээг хумихтай холбоотойгоор халдвар гарсан зургаан аймаг болон нийслэлд гурван тэрбум төгрөгийг Засгийн газрын нөөц сангаас гаргаж тусгаарлалт, халдваргүйжүүлэлт хийх шийдвэр гарсан байгаа.
Халдвар гарсны улмаас аймаг, нийслэлд ариутгал халдваргүйтгэлийн бодисууд, халдвар хамгааллын дэглэм сахих талын олон ажлуудад шаардлагатай санхүүжилтүүд Сангийн яаманд нэгтгэгдсэн. Орон нутгаас ирсэн хүсэлтэд үндэслэн санхүүжилтийг олгох юм" гэлээ.