Эмийн үйлдвэрийн Moderna компани "Ковид-19" вакциныхаа зөвшөөрлийг авахаар АНУ-ын Хүнс, эмийн захиргаанд хүсэлт гаргажээ.

Тус компани нь өөрсдийн шинэ бүтээж буй вакциныг Ковид-19-ээс урьдчилан сэргийлэхэд 94.1 хувь, тус өвчний хүндрэлээс урьдчилан сэргийлэхэд 100 хувь үр дүнтэй байгааг харуулсан өргөтгөсөн мэдээллийн багцыг Америкийн Хүнс, эмийн захиргаанаас эргэн харахыг хүсэхээр болжээ. 

Ингэснээр Moderna нь коронавирусийн эсрэг вакцины тусгай зөвшөөрөл авахаар Америкийн Хүнс, эмийн захиргаанд хандсан хоёр дахь компани болох юм. Өмнө нь Pfizer Арваннэгдүгээр сарын 20-нд ижил төстэй өндөр үр дүнтэй вакцин гаргасан болохоо баталсан хүсэлтээ тавиад байсан юм. АНУ-ын Хүнс, эмийн захиргаа зөвлөх хороотойгоо Арванхоёр дугаар сард хуралдаж, Pfizer-ийн болон Moderna-ийн өргөдлийг хянах болно.

АНУ-д анхны вакцинжуулалтыг "Арванхоёрдугаар сарын сүүлчээр" хийхээр төлөвлөж байна гэж Харшлын болон Халдварт Өвчин Судлалын Үндэсний Хүрээлэнгийн захирал, доктор Антони Фаучи хэллээ.

Moderna мөн өнөөдөр Европын эмийн агентлагаас зөвшөөрөл авах өргөдөл гаргахаар төлөвлөж байна гэжээ.

Moderna-ийн шинэ дата

Хэдхэн цагийн өмнө Moderna эмнэлзүйн 3-р шатны туршилтын үр дүнгийн шинэчилсэн мэдээллээ цацаад байна.

Өнгөрсөн Долдугаар сард Moderna вакцины “double blind” туршилт АНУ-ын 30,000 хүнд хийгдэж эхэлсэн. Хүн бүрийн мэдэж байгаачлан Долдугаар сараас хойш АНУ-д өдөр бүр ковид-19 халдвар антирекорд тогтоож байсан. Гэхдээ вакцин хийлгэсэн бүлэг, плацебо буюу “хоосон” вакцины тун авсан бүлэг хоёрын хооронд асар их ялгаатай байжээ.

Вакцины жинхэнэ тун хийлгэсэн 15000 орчим хүний ​​11 нь Ковид-19 туссан бол плацебо авсан 15000 орчим хүмүүсийн 185 нь Ковид-19 туссан байна. Энэ нь Модернагийн вакцины урьдчилан сэргийлэх магадлал 94.1% гэдгийг харуулж байгаа юм. Мөн тус вакцин хийлгэсэн 11 хүний ​​хэн нь ч хүнд өвчтэй болоогүй боловч плацебо авсан 185 хүний ​​30 нь хүндээр өвчилж, нэг хүн нас баржээ. Вакцин нь өндөр настнууд болон өөр өөр арьс өнгөтэй бүлгийн хүмүүсд ижил үр дүнтэй байсан гэж мэдэгдлээ.  

Пфизерын 3-р үе шатны клиникийн туршилтаар вакцин 95 хувийн үр дүнтэй болох нь тогтоогдсон бөгөөд вакцин хийлгэсэн нэг судалгаанд оролцогч Ковид-19-ийн хүнд хэлбэрээр өвдсөн байна.

Хоёр вакцин нь ижил биш боловч Pfizer ба Moderna хоёулаа хүний ​​биед дархлааны хариу урвалыг өрнүүлэхийн тулд м-РНХ ашигладаг. Вакциныг хэдэн долоо хоногийн зайтай хоёр тунгаар хийх бөгөөд хэдэн өдрийн турш халуурах, бие өвдөх зэрэг сөрөг үр дагаварт хүргэж болзошгүй юм.

Дараагийн алхмууд

Америкийн Хүнс, эмийн захиргаа вакцин ба холбогдох биологийн бүтээгдэхүүний зөвлөх хороотой Арванхоёр дугаар сарын 10-нд уулзаж,  Pfizer өргөдлийг, Арванхоёр дугаар сарын 17-нд Moderna-ийн өргөдлийг хянан хэлэлцэхээр товложээ. Тус зөвлөх хорооны хурлаар хэрвээ вакцин батлагдвал эхний ээлжинд хорин сая тун вакцин хорин оны төгсгөл гэхэд тараагдсан байх болно. Энэ нь мэдээж эмнэлгийн ажилтан, өндөр настан зэрэг нэн шаардлагатай бүлгийнхнийг вакцинжуулахад хүрэлцэх тун юм. Түүний дараачаар 2021 оны эхний хагас гэхэд 500 саяаас 1 тэрбум хүртэлх тунг дэлхий даяар түгээх боломжтой гэж Модернагийн хэвлэлийн төлөөлөгч мэдээллээ.

Б.Лхамаа

Эх сурвалж: cnn.com