Засгийн газраас хуралдаан хойшилж 17 цагаас хуралдахаар болжээ. 

Бүх нийтийн бэлэн байдлын зэрэгт шилжүүлсэн хугацааг 2020 оны арванхоёрдугаар сарын 1-ний өдрийн 06:00 цаг хүртэл сунгасан. Энэ хугацаа ирэх мягмар гаригийн өглөө дуусах тул цаашид хугацааг сунгах эсэх асуудлыг өнөөдөр шийднэ. 

Яг одоо Улсын Онцгой комиссын хуралдаанаар энэ асуудлыг хэлэлцэж байна. 

Ингэхдээ халдвар бүртгэгдсэн бүс нутаг, аймгуудын хөл хориог сунгаж, халдвар гараагүй аймгуудын хөл хориог сулруулж, Бүх нийтийн бэлэн байдалд шилжсэн зэрэглэлийг нэг шат бууруулан, Өндөржүүлсэн бэлэн байдлын зэрэгт шилжүүлэх зэрэг саналууд хуралдааны үеэр гарсан байна.

Өөрөөр хэлбэл, халдварын эрсдэл ихтэй, голомттой суурингуудаа хэсэгчлэн шаталж, бэлэн байдлын зэрэглэлээрээ хөл хориог сунгах, халдвар гараагүй аймгууд дахь бэлэн байдлын зэрэглэлийг бууруулж, өндөржүүлсэн бэлэн байдлын зэрэгт шилжин, хэвийн амьдралын хэмнэл рүү оруулах талаар хэлэлцжээ.

Мөн хөл хориог үргэлжлүүлсэн ч үйлдвэрлэл, үйлчилгээний зэрэг зарим нэн шаардлагатай салбаруудаа нээх чиглэлтэй байгаа юм байна. 

Улсын Онцгой комиссын хуралдаанаас гаргасан саналыг Засгийн газар 17.00 цагт хуралдаж, эцэслэн шийдвэрлэх юм. 

Өнөөдрийн байдлаар Улаанбаатар хот, Сэлэнгэ, Дархан-Уул, Орхон, Дорноговь, Говьсүмбэр, Архангай гэсэн зургаан аймагт халдвар бүртгэгдээд байна.